Qaraǵandylyqtarǵa kómirdi ýaqytyly satyp alý usynyldy

QARAǴANDY. QazAqparat – Qaraǵandy oblysynda kómir satatyn 34 oryn bar. Óńir basshysy Jeńis Qasymbektiń tóraǵalyǵymen ótken jıynda ónerkásip jáne ındýstrııalyq-ınnovatsııalyq damý basqarmasynyń basshysy Murat Qydyrǵanbekov halyqqa arnalǵan «qara altynnyń» jaǵdaıy qandaı ekenin aıtty. Aldaǵy jylý maýsymyna daıyndyq onlaın-formatta talqylandy, dep habarlaıdy QazAqparat tilshisi.

Búginde qaraǵandylyqtar úshin kómir 1 shahta men 9 kenishten jetkiziledi.

«Bıyl kómir óndirý 23,8 mln tonnaǵa jýyq bolady dep boljanǵan. Bul 2020 jylǵa qaraǵanda 5%-ǵa joǵary. Sonymen qatar, ótken jyly halyqqa jáne kommýnaldyq-turmystyq kómirge 4,9 mln tonna, al 2021 jyly 5,6 mln tonna kómir jóneltildi», – dedi Murat Qydyrǵanbekov.

Kómir óndirýshi kásiporyndarda kómirdi tikeleı kenishten shyǵarý úshin alańdar daıyndaldy. Osy aıdan bastap bıýdjettik uıymdar men halyq úshin jóneltilip jatyr. Barlyǵy 34 kómir satý núktesi uıymdastyrylǵan. Onyń 24-i – temirjol tuıyqtary jáne 10-y – qoıma.

«Shubarkól kómir» kompanııasy kún saıyn Qaraǵandy oblysyna 19 vagonnan tıeıdi. Suranystyń artýyna baılanysty osy aıda jóneltýdi 35 vagonǵa deıin, al qyrkúıekten bastap 40 vagonǵa deıin jetkizý qajet», –dep esep berdi basqarma basshysy.

Bılik qyrkúıek-qazan aılarynda dúrbeleń bolmas úshin tutynýshylardy kómirdi qazirden bastap satyp alýǵa shaqyrady.

Buǵan qosa, barlyq óńir boıynsha jylý elektr ortalyqtarynda jóndeý jumystary baqylaýda qalyp otyr. Oblystyń barlyq stansalarynda negizgi jáne qosalqy jabdyqtarda josparly kúrdeli jóndeý júrgiziledi.

«Búginde 9 qazandyq pen 6 týrbınada jóndeý jumystary aıaqtaldy. 12 qazandyq pen 5 týrbına jóndeýde qalady. JEO-2, QarGRES-1 jáne Jezqazǵan jylý elektr ortalyǵynda jóndeý jumystary kesteden kesheýildep júrgizilip jatyr», – deıdi Energetıka jáne TKSh basqarmasynyń basshysy Ulantaı Úsenov.

Sondaı-aq, bıyl oblystyń qalalary men aýdandaryn gazdandyrý júrgizilip jatyr. Bul baǵyttaǵy jumystar oblys ákimdigimen únemi qadaǵalanyp otyrady.

Óńir basshysy barlyq qalalar men aýdandar basshylaryna jylý berý maýsymyna daıyndyqty turaqty baqylaýda ustaýdy tapsyrdy.

«Bıýdjettik uıymdar úshin kómirdiń ýaqtyly jetkizilýin qamtamasyz etý kerek. Kómirdiń baǵasyn bir deńgeıde ustalýyna turaqty monıtorıng júrgizý qajet. Baǵa ázirge turaqty, biraq jappaı satyp alý bastalǵannan keıin baǵalar kóteriledi. 2017 jyly alypsatarlyq faktisin esimizde saqtaımyz, sondyqtan kómir jetkizýshilermen birge onyń qoımalarda, tuıyqtarda jáne ótkizý oryndarynda bolýyn pysyqtaý qajet», – dep atap ótti Jeńis Qasymbek.