Qaraǵandylyqtardy saıabaqtarda 100 nusqaýshy jattyqtyratyn boldy
QARAǴANDY. QazAqparat - Qaraǵandylyqtardy saıabaqtar men sport zaldarynda 100 nusqaýshy jattyqtyratyn boldy. Oblys ákimi Erlan Qoshanov esep berý kezdesýinde sport salasyna qatysty josparlardy jarııa etti, dep habarlaıdy QazAqparat.
Qaraǵandy oblysynda qoljetimdi sport ınfraqurylymyn damytýǵa kóńil bólinýde. Ótken jyly kóptegen jańa nysandar ashyldy. Olardyń qatarynda Abaı qalasyndaǵy júzý basseıni, Shet aýdanyndaǵy DSO, Qaraǵandyda shaǵyn fýtbolǵa arnalǵan sport kesheni jáne basqalary bar.
Oblys ákiminiń aıtýynsha, Qaraǵandyda bıyl «Rýhanı jańǵyrý» baǵdarlamasy boıynsha úlken trıatlon parki ashylady. Aýyl turǵyndaryna arnap óńirde taǵy da birneshe dene sport ortalyqtaryn salý josparlanýda.
Sonymen qatar, Elbasynyń tapsyrmasy boıynsha Qaraǵandyda olımpıadalyq standarttarǵa saı 50-metrlik júzý basseıni men Temirtaýdaǵy zamanaýı sport kesheniniń qurylysy bastalady.
«Buqaralyq sportty damytý úshin keshki ýaqytta mektepterde, joǵary oqý oryndarynda jáne kolledjderde sport zaldaryn paıdalaný kerek. Biraq ol úshin mamandar qajet. Biz aýlalarda jáne sport zaldarynda qosymsha 100 sport nusqaýshylary jumys isteıtin bolady degen sheshim qabyldadyq», - dedi Erlan Qoshanov.
Ol oblysta ulttyq sport túrlerine degen qyzyǵýshylyq joǵary ekenin atap ótti. Búginde óńirde sporttyń birneshe túrimen jáne ulttyq sportpen oblysta 43 myńnan astam adam aınalysady.
Oblys ákimi sondaı-aq Qaraǵandyda keleshekte ıppodrom qurylysy kózdelip otyrǵanyn jetkizdi. Bul jobany kásipkerlerge memlekettik-jekeshelik áriptestik baǵdarlamasy boıynsha júzege asyrý usynylyp otyr.
