Qaraǵandylyqtardy qashyqtyqtan jumys isteýge úıretedi
QARAǴANDY. QazAqparat - Qaraǵandylyqtardy úıde otyryp, qashyqtan tabys tabýǵa úıretetin bolady. Bul týraly Qaraǵandy oblysynyń ákimi Erlan Qoshanov halyqpen eseptik kezdesýi barysynda aıtty, dep habarlaıdy QazAqparat.
Óńir basshysynyń aıtýynsha, frılans nemese úıden jumys isteý birinshi kezekte, keńselerde, dúkenderde nemese kásiporyndarda jumys isteýge múmkindigi joq kópbalaly analar úshin ózekti.
«Kóptegen elderde qashyqtan jumys isteý naryǵy mıllıardtaǵan dollardy quraıdy. Sondyqtan bizge de bul quraldar men bilimdi kópbalaly analar, múmkindigi shekteýli jandar men zeınetkerlerge berý kerek», - dedi Erlan Qoshanov.
Frılanserler mektebinde úıden shyqpastan qalaı jáne ne arqyly aqsha taýyp, osy sekildi tabys kózin qalaı zańdastyrýǵa bolatyny, sonymen qatar qandaı úlgi boıynsha salyq tóleý kerektigi úıretiledi. Bul mektepke kez-kelgen nıet bildirýshiler kelip, bilim ala alady. Alaıda tirkeý kezinde kóbine kópbalaly analarǵa, múmkindigi shekteýli jandarǵa jáne zeınetkerlerge basymdylyq beriledi. Frılans mektebinde sabaqtar tegin ótkiziledi.
Buǵan qosa jaqyn arada óńirde bıznes-ınkýbator jumys isteıtini týraly málim boldy. Onda kópbalaly analardy bıznesti tabysty júrgizý negizderine úıretetin bolady. Kópbalaly analarǵa óz isin ashýǵa 200 grant qarastyrylǵan.
Sondaı-aq, «Bastaý bıznes» bilim berý baǵdarlamasy boıynsha jastarǵa arnalǵan granttardyń jalpy somasy 10 esege artty. Granttardyń mólsheri de 300 myń teńgeden bir mıllıonǵa deıin ósti. Mundaı granttardy qalaı alý jáne bıznesti qaı salada júrgizýdi úırenýge qatysty aqparatty óńirlik kásipkerler palatasynan jáne jumyspen qamtý oryndarynan alýǵa bolady. Bıylǵy jyly Qaraǵandynyń vokzaldary men iri bazarlarynda osyndaı nysandar ashyldy. Olarǵa bir aı ishinde 1,5 myń adam kelgen.
