Qaraǵandylyqtardy baspana, avtobýs jáne jol máselesi erekshe alańdatady

QARAǴANDY. QazAqparat – Qaraǵandylyqtar oblys ákimi Ermaǵanbet Bólekpaevpen kezdesýde TKSh, jol jóndeý, qoqys alańdarynyń tapshylyǵy, kezekte turǵandarǵa páter berý, sırek júretin qoǵamdyq kólik sııaqty máselelerdi kóterdi, dep habarlaıdy QazAqparat tilshisi.

Eki saǵattan astam ýaqytqa sozylǵan jıynda qaraǵandylyqtar kóp suraq qoıdy, olarǵa tıisti vedomstvo basshylary birden jaýap berip otyrdy.

Turǵyndar tarapynan birneshe jyl buryn aýlalarda paıda bolǵan sapasyz oıyn alańdaryna shaǵym tústi.

Olardy ornatýmen aınalysqan selsoq merdigerdi sotqa berilip, jaýapqa tartyldy.

Endi aýlalardy abattandyrý barysynda sapaǵa kóbirek kóńil bólinedi.

2023 jyly Qaraǵandyda 33 aýla aýmaǵyn retke keltirý josparlanǵan. 50 balalar oıyn alańyn, 12 fýtbol alańyn, tórt basketbol alańyn jáne eki ámbebap kort ornatýǵa qarajat bólinedi.

Jaqynda Maıqudyqta ashylǵan № 14 mekteptiń aınalasyn jaryqtandyrý kózdelgen.

Qaraǵandy ákiminiń m.a. Meıram Kojýhovtyń aıtýynsha, kelesi jyly osy aýdandy abattandyrý qarastyrylǵan. Ázirge keshki ýaqytta patrýl sany artady.

«Jelide avtobýs az, keıbir shalǵaı aýdandardan jetý múmkin emes» dep shaǵymdandy jurtshylyq.

Qaraǵandy avtobýs parkin jańartý jáne keńeıtý jumysy turaqty júrip jatyr.

Keshe ǵana QazTehna Saran zaýyty segiz avtobýsty «Taksokombınat-1» JShS-ne berdi. Olardy № 7 jáne 01 marshrýttarǵa jiberý josparlanýda.

«№3 Avtopark Maıqudyq qalalyq marshrýttaryna tartylǵan 50 jańa avtobýs aldy. № 5 avtoparkpen 2023 jyldyń birinshi jartyjyldyǵynda jetkiziletin 50 avtobýs satyp alýǵa shart jasaldy. «Taksokombınat» tasymaldaýshysy qańtar-aqpan aılarynda 32 jańa avtobýstyń jetkizilýin kútip otyr», - dedi Meıram Kojýhov.

Sondaı-aq, jańa jylda uzyndyǵy 45,2 km 25 avtojoldy ortasha jóndeý jáne 110 myń sharshy metr joldy aǵymdaǵy jóndeý kózdelgen.

Pıchýgın kóshesindegi jol tósemi kúrdeli jóndeýden ótedi. Kúngeı sh/a, Rabochıı, Sahalın, JBI kentterinde uzyndyǵy 20 km joldy qyryp, tegisteý josparlanyp otyr.

Nóserli káriz jelilerin tazalaý jáne jóndeý jalǵasady.

Óńir basshysy ótinishterdi muqııat tyńdap, basqarma basshylaryna barlyq máseleni pysyqtaýdy tapsyrdy.

2023 jyly TKSh salasyna, onyń ishinde jylý elektr stantsııalarynyń jaǵdaıyna kóp kóńil bólinedi.

«Qys bizdiń osal tustarymyzdy kórsetti, olardy shuǵyl túrde joıý kerek. Biz jylý, sý, elektr jáne gazben jabdyqtaý sekildi máselelerdi sheshýge tyrysamyz. Jol jóndeý, aýlalar men qoǵamdyq aýmaqtardy abattandyrý jalǵasady», - dep atap ótti oblys ákimi.

Kezdesý sońynda Ermaǵanbet Bólekpaev azamattardy jeke máseleleri boıynsha qabyldady.