Qaraǵandylyqtar jolaqyny elektrondy termınaldar arqyly tóleıtin bolady
QARAǴANDY. QazAqparat - Sáýir aıynyń sońyna qaraı Qaraǵandydaǵy qoǵamdyq kólikterde elektrondy tólem termınaldary ornatyla bastaıdy, dep habarlaıdy QazAqparat.
Qaraǵandyda 20 sáýirden bastap koreıalyq ınvestorlar jolaýshy tasymaldaıtyn barlyq avtobýstarǵa elektrondy termınaldar ornata bastaıdy.
«Qaraǵandyǵa arnalyp jeke termınaldar jasalyp jatyr. Ony daıyndaý barysynda bizdiń óńirdiń klımattyq jaǵdaılary eskeriletin bolady. 20 sáýirde termınaldardy ornatý jumystary bastalady»,- dep málimdedi Qaraǵandy qalasynyń Kommýnaldyq sharýashylyq, jolaýshylar kóligi jáne avtokólik joldary bólimi bastyǵynyń mindetin atqarýshy Eskendir Qabıdolla.
Sonymen qatar elektrondy kartalar da jasalyp jatyr. Mamandardyń málimetinshe, kartada ár jolaýshynyń aty-jóni men fotosy kórsetiledi. Bul jalǵan jolaýshy kartasyn alyp júrý áreketiniń aldyn alýǵa yqpal etedi.
«Zańsyz jolaqy bıletteriniń jasalýyna jol bermes úshin olardy jeke basqa laıyqtap jasaımyz. Jańa bılette adamnyń fotosy men aty-jóni kórsetiledi»,- deıdi Eskendir Qabıdolla.
Araılym Satybaldyqyzy
