Qaraǵandylyqtar Tuńǵysh Prezıdent kúni baspanaly boldy
Páterler kezekte turǵan áleýmettik qorǵalǵan turǵyndarǵa, sonyń ishinde múmkindigi shekteýli azamattarǵa, tolyq emes otbasylarǵa, bıýdjettik uıymdar qyzmetkerlerine berildi. Baspanaly bolǵandardyń arasynda osy baqytty kúndi on jyldan astam ýaqyt boıy kútkender de bar. Olardyń armany «Nurly jer» memlekettik baǵdarlamasynyń arqasynda oryndaldy.
«Barshańyzdy Tuńǵysh Prezıdent kúnimen quttyqtaımyn. Dál osy kúni armandaryńyz oryndalyp, páterge ıe bolyp otyrsyzdar. Elbasynyń «Nurly jer» jáne «7-20-25» atty bastamalary aıasynda oblysta jáne jalpy elimizde belsendi túrde baspanalar salynýda. Osy ıgi istiń aýqymyn jyl saıyn keńeıte bermekpiz», - dedi Erlan Qoshanov.
Jańadan boı kótergen turǵyn úıde 130 páter bar. Aı saıynǵy tólem onyń aýdanyna baılanysty: ár sharshy metri úshin 736 teńge.
«Biz 91 sharshy metrli úsh bólmeli páter aldyq. Aı saıyn shamamen 67 myń teńge tóleımiz. Buǵan deıin kóp jyl boıy páter jaldap keldik. Árıne, biz baqyttymyz. Endi óz baspanamyz bar», - deıdi Táttimbet atyndaǵy óner kolledjiniń qyzmetkeri Janar Nurketaeva.
Páter ıesi atanǵandardyń sózine qaraǵanda, bul baǵdarlama ıpotekamen úı alýǵa shamasy kelmeı júrgender úshin tamasha múmkindik.
«Men páter alý maqsatynda bankterdiń tabaldyryǵyn tozdyrǵam. Jalaqym az bolǵandyqtan, meni qaıtara berdi. Kúıeýim qaıtys bolyp, eki balammen qaldym. Kezekte on jyl turdym. Armanym oryndalyp, óz baspanamyzǵa ıe boldyq. Páter bir bólmeli bolsa da, ishi keń. Aıyna 30 myń teńge tóleımin. Buǵan shamam jetedi», - deıdi Zoıa Matıýhına.
Aıta keteıik, Tuńǵysh Prezıdent kúni Balqash, Abaı, Osakarov aýdandarynyń turǵyndary da qonys toıyn toılady. Ondaǵan otbasy «Nurly jer» baǵdarlamasynyń arqasynda baspanaly boldy.
Mereke kúni páter kiltteri ǵana tabystalǵan joq, saltanatty jaǵdaıda birqatar áleýmettik nysandar da ashyldy.
