Qaraǵandylyqtar saıabaqqa 400 aǵash otyrǵyzdy
QARAǴANDY. QazAqparat - Búgin Qaraǵandy qalasyndaǵy Qazaqstan Táýelsizdiginiń 10 jyldyǵy saıabaǵynda 400 jasyl jelek otyrǵyzyldy, onyń 250-i - qaraǵaı, 150-i - jóke aǵashtary, dep habarlaıdy QazAqparat tilshisi.
Sharaǵa oblys jáne qala ákimderi, qalalyq jáne oblystyq máslıhat depýtattary, «Nur Otan» partııasy men Qoǵamdyq keńestiń músheleri qatysty.
«Meniń alǵashqy otyrǵyzǵan aǵashym áli esimde. Bul mektep jyldary bolǵan edi. Sol kezde saıabaq jasaǵan edik, aǵashtardy jyl saıyn otyrǵyzdyq. Ótken aptada men sol jerde bolyp qaıttym. Bul Shet aýdanyndaǵy Jaryq stansasy, qazir ol Sáken Seıfýllınniń esimimen atalady. Búgingi tańda men oqyǵan mektepter joq, al saıabaq áli kúnge deıin ósip keledi», - dedi oblys ákimi Erlan Qoshanov.
Búgin otyrǵyzylǵan qaraǵaılar men jókelerdi Qaraǵandy saıabaqtary men gúlzarlary basqarmasynyń qyzmetkerleri kútetin bolady. Aǵashtardy jelden qorǵaý úshin tirekterge baılaıdy jáne aptasyna eki ret sýaryp otyrady.
Erlan Qoshanov oblystyń qalalary men aýdandaryn kógaldandyrý basty mindetterdiń biri ekenin atap ótti. Ol osy salada júıelik tásil qoldanýdy talap etti. Qazir Temirtaýda dendrologııalyq jospardyń ekinshi kezeńi ázirlenýde. Ol qaladaǵy ekologııalyq jaǵdaıdy jaqsartý úshin qajet.
Sonymen qatar, jaqyn arada Balqash qalasynda «Jasyl keńes» jumys isteı bastaıdy.
Oblys ákiminiń aıtýynsha, aǵashtardyń jersinýi qatań baqylanady. Sonymen qatar, sáýir aıynda qurylǵan jasyl jelekterdiń elektrondyq kartasy da kómektesedi. Onda Qaraǵandynyń barlyq aǵashtary men butalary, olardyń jasy, túri, mólsheri jáne jaǵdaıy kórsetilgen. Kartaǵa jańadan egilgen kóshetter týraly málimetter engiziledi. Osylaısha, otyrǵyzylǵan aǵashtardyń qansha bolǵanyn tekserýge bolady.
