Qaraǵandylyqtar páterlerindegi jylýǵa qatysty shaǵym aıtýda
QARAǴANDY. QazAqparat – Sońǵy ýaqytta Qaraǵandy qalasynyń túrli aýdandarynda jylýmen jabdyqtaý sapasyna shaǵymdar jıilep ketti. «Karaganda Energotsentr» JShS munyń sebebin túsindirdi, dep habarlaıdy QazAqparat tilshisi.
Qazirgi ýaqytta qalanyń ortalyq bóligin jylý energııasymen qamtamasyz etetin JEO-1 temperatýralyq keste boıynsha esh aýytqýsyz jumys istep tur.
JEO-3 boıynsha: stantsııadan jylý energııasy eki kezek boıynsha bólinedi – birinshi jáne ekinshi. Birinshi kezekte – jylý tasymaldaǵyshtyń temperatýrasy 96˚S; keri jelilik sýdyń temperatýrasy – 48,7˚S, ekinshi kezekte – jylý tasymaldaǵyshtyń temperatýrasy – 109˚S; keri jelilik sýdyń temperatýrasy – 48,4˚S.
Temperatýralyq kestege sáıkes, «Teplotranzıt Karaganda» JShS energııa berýshi kásipornynyń ótinimi boıynsha jylý tasymaldaǵyshtan jylýdy 115˚S temperatýramen berý talap etiledi. Іs júzinde birinshi kezekte jylý 96˚S-pen berilip otyr. Birinshi kezekte jelilik sýdyń qyzbaýynyń negizgi sebebi – qaladan qaıta oralǵan keri jelilik sýdyń tómen temperatýrasy. Temperatýra kestesine sáıkes keri jelilik sýdyń temperatýrasy 58˚S bolýy kerek. Qazirgi ýaqytta ol 48,7˚S temperatýramen stantsııaǵa keledi, sondyqtan ony 115˚S deıin qyzdyrý tehnıkalyq jaǵynan múmkin emes.
JEO-1 jáne JEO-3-te ornatylǵan barlyq jelilik jabdyqtar jumysqa barynsha qosylǵan. Jabdyqtyń jumysynda aqaýlar joq. Stantsııada jelilik sýdy jylytýǵa qyzmet etetin barlyq ornatylǵan jylý almastyrǵyshtardy qamtamasyz etý úshin jetkilikti bý bar. 5 qańtardan 6-shy qańtarǵa qaraǵan túni I jáne II kezekter arasynda jylý energııasyn birkelki taratý úshin jabdyqtyń ońtaıly jumys rejımin izdeýde №5 týrboagregat ýaqytsha, tańǵy saǵat 6-dan 8-ge deıin ajyratyldy. Saǵat 08.00-de №5 st. týrboagregaty iske qosyldy. Jylý jelileriniń ınertsııasyn eskere otyryp, salqyndatqysh temperatýrasynyń qysqa merzimdi tómendeýi jylýdyń jalpy shyǵýyna áser etpedi. 6 qańtarda saǵat 12.00-de kórsetkishter qalpyna keltirildi.
Qazirgi ýaqytta JEO-3 uzaq merzimge belgilengen tómen temperatýralar (- 21˚S jáne odan tómen) kezinde jylý energııasynyń barynsha múmkin bolatyn mólsherin beredi. Tómen kórsetkishteri bar keri jelilik sýdyń aǵynyn eskere otyryp, temperatýrasy 112˚S-tan asatyn stantsııadan jylý energııasyn berý qazirgi ýaqytta tehnıkalyq turǵyda múmkin emes.
JEO-3-ten jylý energııasyn qosymsha berý úshin úshinshi jylý qubyryn salý jáne Qaraǵandy JEO-3 keńeıtý qajet.
JEO-3 jáne JEO-1-degi barlyq jabdyqtardyń jumysyna syrtqy monıtorıng táýligine úsh ret - 06.00, 12.00, 18.00-de júzege asyrylady. Derekter TJ-ǵa, Qaraǵandy qalasynyń tirshilikti qamtamasyz etý bólimine, biryńǵaı dıspetcherlik qyzmetke, «Teplotranzıt Karaganda» JShS-ǵa beriledi. JEO-1 jáne JEO-3 jumysy týraly bul aqparat «Teplotranzıt Karaganda» JShS-ǵa onlaın kelip túsedi.
Esterińizge sala keteıik, «Karaganda Energotsentr» JShS - Qaraǵandy qalasynyń turǵyndary men kásiporyndary úshin elektr jáne jylý energııasynyń negizgi óndirýshisi. Energetıkalyq keshenniń quramyna jergilikti mańyzy bar stantsııa - JEO-1 jáne óńirlik mańyzy bar stantsııa - JEO-3 kiredi.
Qosymsha aqparatty myna telefondar arqyly alýǵa bolady: (8-7212) 41-92-01, 42-00-77 (1271), 8-701-756-28-46 (qoǵammen baılanys bólimi).
