Qaraǵandylyqtar olımpıadashylarǵa fleshmob arqyly qoldaý kórsetti

QARAǴANDY. QazAqparat – Qaztutynýodaǵy Qaraǵandy ýnıversıtetiniń stýdentteri qysqy Olımpıadaǵa qatysatyn Qaraǵandy oblysynyń sportshylaryn qoldaý maqsatynda fleshmob ótkizdi. Aktsııanyń bastamashysy Dene shynyqtyrý jáne sport basqarmasy boldy, dep habarlaıdy QazAqparat tilshisi.

N. Ábdirov atyndaǵy sport saraıynyń aldyndaǵy alańǵa JOO-nyń 50 oqýshysy jınaldy. Stýdentter áserli bı bılep, qaraǵandylyqtarǵa tórt jyldyq basty jarystarda sáttilik tiledi.

Bul joly Qaraǵandy oblysynan Olımpıadaǵa bıatlonshy Vladıslav Kıreev pen konkımen júgirýshi Ekaterına Aıdova qatysady.

Eki sportshynyń da Qaztutynýodaǵy Qaraǵandy ýnıversıtetine tikeleı qatysy bar. Ekaterına Aıdova – onyń túlegi, al Vladıslav munda oqýyn jalǵastyrýda.

«Eki sportshy da bizdiń tárbıelenýshilerimiz. Ekaterına men Vladıslavtyń aldynda qıyn mindet tur. Osyndaı mańyzdy sporttyq jarysta elimizdiń namysyn qorǵaý solarǵa júkteledi. Olarǵa laıyqty óner kórsetip, barynsha kóp marapat ákelýlerine tilektespiz. Biz olarǵa senemiz!», – deıdi QR Táýelsizdiginiń 10 jyldyǵy atyndaǵy qysqy sport túrleri boıynsha ORMBJM basshysy Gúlnar Áliqulova.

Ekaterına Aıdova – tórt qurlyqtyń chempıony. XXIV qysqy Olımpıada oıyndaryna qatysý úshin ol 500, 1 000, 1 500 metr qashyqtyqta konkımen júgirý sportynda úsh lıtsenzııa jeńip aldy.

Bıatlonshy Vladıslav Kıreev – QR sport sheberi jáne jastar arasynda Qazaqstan men Azııa chempıony.

Esterińizge sala keteıik, XXIV qysqy Olımpıada oıyndary Beıjińde 4-20 aqpan aralyǵynda ótedi. Jarysta Qazaqstan namysyn 34 sportshy qorǵaıtyn bolady.