Qaraǵandylyqtar oblys ákimine óz problemalarymen júgindi

QARAǴANDY. QazAqparat – Qaraǵandy oblysynyń ákimi Jeńis Qasymbek azamattardy jeke máseleleri boıynsha onlaın-qabyldaý ótkizdi. Turǵyndar áleýmettik máselelerdi sheshýde, bıznes pen densaýlyq saqtaý salasynda kómek surady. Máselelerdi jedel sheshý úshin qabyldaýǵa qalalar, aýdandar jáne beıindi vedomstvo basshylary da qatysty, dep habarlaıdy QazAqparat tilshisi.

Mysaly, Qaraǵandy qalasynyń turǵyny Gaýhar Mansurova turǵyn úı máselesin sheshýge qatysty kómek surady. Ol balasyn jalǵyz ózi tárbıeleıdi, densaýlyǵyna baılanysty problemalary bar. Áıel baspana alýǵa kezekte tur, biraq ol baıaý qozǵalýda. Jeńis Qasymbek onyń máselesin sheshýge Qaraǵandy ákimi men densaýlyq saqtaý basshysyn tartty.

Eki adam qalanyń iri kásiporyndaryna jumysqa ornalasýǵa ótinish bildirdi. Másele birden

«Qazaqmys» pen «ArselorMıttal Temirtaý» basshylyǵynyń baqylaýyna alyndy.

Kásipker Roza Muqanova segiz jyldan beri bylǵary buıymdardy qalpyna keltirýmen aınalysyp keledi. Qazir jumysta qıyndyqtar baryn aıtty. Onymen birge úsh sańyraý jumysshy jumys isteıdi. Kásipkerdiń aıtýynsha, qoldaý suraıtyn basqa jeri qalmaǵan. Jalǵa alýshylar úı-jaı úshin tólemdi tómendetti, biraq óz isin damytýǵa qarajat áli de jetispeıdi.

«Kómek kórsetý kerek. Bizde kásipkerlikti qoldaý úshin túrli granttar bar, biz shette qalmaýymyz kerek. Mindetti túrde máseleni sheshý qajet. Kásipkerlik basqarmasynyń basshysy Tatıana Ablaevaǵa bul máseleni pysyqtaýdy tapsyramyn», - dedi oblys ákimi qol astyndaǵylarǵa. Buqar jyraý aýdany Rostovka aýylynyń bastamashyl tobynyń ókili jaıylymdardyń jetispeýshiligine baılanysty problemalar týraly aıtyp berdi. Kóptegen jerler jeke menshikte, sondyqtan jergilikti bılik bul máseleni sheshe almaıdy. Sonymen qatar, turǵyndar mektep- ınternattyń sapasyz abattandyrylýyna nazar aýdardy.

Kórshi Qyzyljar aýylynyń 900 turǵyny medpýnkt, sport zaly, ınternettiń joqtyǵyna shaǵymdandy. Aýyl turǵyndarynda sonymen birge aýyz sýǵa qatysty da problemalary bar. Buqar jyraý aýdanynyń ákimi Serjan Aımaqovtyń aıtýynsha, barlyq máseleler sheshiletin bolady.

Sýǵa keletin bolsaq, sý qubyry jelilerine jóndeý júrgizilýde. Mamyr aıynda jumystar

aıaqtalady.

Jeńis Qasymbek barlyq máselelerdi sheshýdi jáne olar boıynsha ońtaıly sheshim tabýdy

tapsyrdy.

Azamattardy jeke máseleleri boıynsha qabyldaý ár aıdyń sońǵy jumasynda ótedi. Ákimniń

qabyldaýyna (8-7212) 50-15-28, ish. 6713 telefon nómiri, [e-mail] elektrondyq poshta arqyly jáne Álıhanov kóshesi, 13 mekenjaıy boıynsha ótinishter bóliminde jazylýǵa bolady.