Qaraǵandylyqtar oblys ákimine oıyn avtomattaryna qatysty shaǵymdandy
QARAǴANDY. QazAqparat - Qaraǵandy turǵyndary oblys ákimi Erlan Qoshanovqa dúkenderde zańsyz oıyn avtomattarynyń ornatylýyna shaǵymdandy. Bul týraly óńir ákimdiginiń baspasóz qyzmetinen málim etti, dep habarlaıdy QazAqparat.
«Meniń Twitter-degi akkaýntyma Qaraǵandy turǵyny dúkenderde oıyn apparattary jıi ornatyla bastaǵanyna shaǵymdandy. Bul óte mańyzdy másele. Qumar oıyndar áleýmettik dert ekeni barshaǵa málim. Sebebi, onyń saldarynan otbasylarda qaıǵyly jaǵdaılar bolyp jatady. Bul jerdegi eń bastysy, zańsyz qyzmettiń órkendep ketýine jol bermeý», - dedi Erlan Qoshanov apparat jınalysynda.
Oblys ákiminiń sózinshe, shaǵym mátininde 45-shi oramda ornalasqan «Loto klýb» týraly aıtylǵan.
«Ekonomıkalyq tergeý departamenti basshysynyń mindetin atqarýshy Dáýlet Tatýbaevtyń aıtýynsha, bul klýbqa osyǵan deıin tekserýler júrgizilgen. Biraq eshbir zańbuzýshylyqtar anyqtalmaǵan. Mekeme ıelerinde lotoreıa bıletterin satýǵa lıtsenzııa bar ekeni jáne ol jerde oıyn avtomattary bolmaǵany anyqtaldy», - deıdi Dáýlet Tatýbaev.
Departamenttiń málimetine sáıkes, «Loto klýb» oblystyń 7 jerinde jumys isteıdi.
Degenmen, Erlan Qoshanov bul máselege muqııat qaraýdy talap etti.
«Áleýmettik jelilerde osy taqyrypty kótergen adamdardy tabyńyzdar. Olarmen birge barlyq nysandardy aralap shyǵyńyzdar. Eger olar zańbuzýshylyqtar týraly bilse, kórsetsin», - dep tapsyrdy oblys ákimi departament basshylyǵyna.
Qaraǵandy oblysynda jyl basynan beri zańsyz oıyn bıznesin uıymdastyrǵany úshin úsh qylmystyq is qozǵalyp, 125 oıyn avtomaty tárkilendi. 2017-2018 jyldary 19 adam qylmystyq jazaǵa tartyldy.
Aıta keteıik, qylmystyq jaýapkershilik oıyndy uıymdastyrý úshin ǵana emes, zańsyz oıyn avtomattaryn ornalastyrýǵa oryn bergeni úshin de qarastyrylǵan.
