Qaraǵandylyqtar «meıirimsiz» bolyp shyqty - eksperıment
QARAǴANDY. QazAqparat - Polıtsııa qyzmetkerleri men eriktiler qala ortalyǵynda jasandy jol apatyn uıymdastyryp, qaraǵandylyqtardyń qaıyrymdylyǵyn tekserip kórdi, dep habarlaıdy «QazAqparat» HAA tilshisi.
Eksperıment qorytyndysy boıynsha soǵylǵan «Mersedestiń» ishindegi qan-josa bolǵan adamdardy kórgen júrgizýshilerdiń kóbi uıaly telefondaryn alyp vıdeoǵa túsirgen, keıbireýleri oqıǵany baıqamaǵan syńaıda óte bergen.
«Biz halyqaralyq Qyzyl krest jáne Qyzyl jarty aı qozǵalystarynyń Qaraǵandy qalasyndaǵy fılıaldary qyzmetkerlerimen birlesip qaraǵandylyqtar zardap shekkenderge alǵashqy kómek kórsete alady degen saýalǵa jaýap izdep kórdik. Alaıda, keıbir kólik ıeleri áleýmettik jelilerde jarııalaý úshin oqıǵany kamerasyna túsirip alýǵa asyqty. Basqalary kórmegendeı óte berdi. Alǵashqy medıtsınalyq járdem alǵashqy 15 mınýtta kerek. Júrgizýshiler avtomektepterde mindetti túrde alǵashqy kómek kórsetý kýrstarynan ótedi, alaıda eshkim jol apatynan zardap shekkenderge kómek kórsetýge sheshim qabyldaı qoıǵan joq», - dep málim etti Qaraǵandy oblysy ishki ister departamentiniń jergilikti polıtsııa qyzmetiniń baspasóz qyzmeti.
Eriktiler bas jaraqatyn, kógergenin, tipti aıaqtyń ashyq synyǵyn uqsatyp jasady. Jasandy apat qalanyń eń qozǵalysy kóp bóligi - Buqar Jyraý dańǵylynda jasaldy.
Aıta keteıik, jyl basynan beri Qaraǵandy oblysynda 576 jol kóligi oqıǵasy bolyp, 120 adam qaza tapqan, 773-i túrli dárejede jaraqat alǵan.
