Qaraǵandylyqtar mektep janynda qazylǵan aryqtyń qaraýsyz qalǵanyna narazy

QARAǴANDY. QazAqparat - Qaraǵandy qalasynda Baýyrjan Momyshuly kóshesiniń turǵyndary kommýnaldyq mekeme qyzmetkerleri №103 mekteptiń janynda bir aı boıy transheıa qazyp, sol kúıi qaldyryp ketkenin aıtyp shaǵymdandy, dep habarlaıdy QazAqparat tilshisi.

Kún saıyn aryqtyń janynan №103 mektep oqýshylary ótedi. Ata-analar tereńdigi bir jarym metrge jetetin transheıaǵa balalar qulap kete me dep alańdaıdy.

«Bul jerdi qazyp, belgileri bar armatýrany qadap, barlyǵyn sol beti tastap ketti. Bul armatýralar óte úshkir. Sabaqtan keıin balalar osy jermen júgiredi. Bul armatýraǵa bireý qulap ketýi múmkin. Qazǵan soń jumysty sońyna deıin jasaý kerek qoı. Barlyǵyn sol qalpynda tastap ketti», - deıdi osy mektepke balasy baratyn ata-ana.

Jumysshylar qoldanǵan jalǵyz qaýipsizdik sharasy – aryqtyń perımetri boıynsha qazyqtar ornatyp, qaýipti aımaqty eskertý lentasymen qorshaǵan. Mektep basshylyǵy bul jóndeý týraly aldyn ala habarlap, kelisim bergenderin aıtady.

«Bizdiń mektep aýmaǵynda jeke kompanııa qubyr tartý jumystaryn júrgizip jatyr. Mektep saıtynda ata-analarǵa habarlama jasadyq. Sondaı-aq oqý ýaqytynda oqýshylarǵa eskertý jasaldy», - dep túsindirdi №103 mektep dırektorynyń sharýashylyq bólimi boıynsha orynbasary Mels Turmaǵanbetov.

«Qaraǵandy Sý» kompanııasynda jumysshylar bul ýchaskede jer jumystaryn júrgizbegeni týraly esep berdi. «Teplotranzıt Qaraǵandy» kompanııasynda da jóndeý týraly aqparat teriske shyǵaryldy. Qaraǵandy qalasynyń turǵyn úı-kommýnaldyq sharýashylyǵy bóliminiń ókilderi jeke kompanııalardyń eshqandaı ruqsat almaǵanyn aıtty.

Degenmen, transheıa qazǵan jaýapty kompanııa tabyldy.

«Elıtınvest Grýpp» JShS uıymy jumys óndirisine qajetti qujat resimdemeı, jumystardy zańsyz júrgizgen. Osy másele boıynsha jaqyn arada ákimshilik polıtsııa qyzmetkerleri QR Ákimshilik quqyq buzýshylyq týraly kodekstiń 505 jáne 631-baptary boıynsha ákimshilik hattama jasap, ol jerge baratyn bolamyz. Sondaı-aq materıaldyq akt jasalady, keıin sotqa talap-aryz beriledi», - dep túsindirdi Qaraǵandy qalasy TKSh bóliminiń bas mamany Danııar Nurǵazın.