Qaraǵandylyqtar medıtsınalyq saqtandyrý esebinen 350 myńnan astam tegin qyzmet aldy
QARAǴANDY. QazAqparat – Birinshi jartyjyldyqta Qaraǵandy oblysynyń turǵyndaryna medıtsınalyq saqtandyrý qarajaty esebinen 350 myńnan astam tegin stomatologııalyq qyzmet kórsetildi.
Medıtsınalyq saqtandyrý qory olardyń aqysyn tóleýge 519 mıllıon teńgeden astam qarajat baǵyttady, dep habarlaıdy QazAqparat tilshisi.
MÁMS júıesi sheńberinde tegin josparly stomatologııalyq kómekke 18 jasqa deıingi balalar men júkti áıelder júgine alady. Josparly stomatologııalyq kómekke terapevtik qabyldaý, І jáne ІІ dárejeli bet jáne orta karıesti emdeý, tereń karıesti emdeý, hırýrgııalyq qabyldaý, tisti alyp tastaý, anestezııa, tis rentgenografııasy jáne basqa protsedýralar jatady. Josparly stomatologııalyq kómektiń tizimine barlyǵy 34 qyzmet kiredi.
«Shuǵyl túrde tegin stomatologııalyq kómekke 18 jasqa deıingi balalar, júkti áıelder, Ekinshi dúnıejúzilik soǵystyń qatysýshylary, I, II, III toptaǵy múgedekter, «Altyn alqa», «Kúmis alqa» alqalarymen marapattalǵan kóp balaly analar, AÁK alýshylar, jasy boıynsha zeınetkerler, ınfektsııalyq, áleýmettik mańyzy bar aýrýlarmen aýyratyn jáne aınalasyndaǵylarǵa qaýip tóndiretin aýrýlarmen aýyratyn naýqastar júgine alady», – dep atap ótti medıtsınalyq saqtandyrý qorynyń Qaraǵandy fılıaly dırektorynyń orynbasary Álibek Berdibekov.
Shuǵyl stomatologııalyq kómek 50-den astam qyzmetti qamtıdy. Sondaı-aq MÁMS júıesinde jaq-bet aımaǵynyń týa bitken patologııasy bar balalarǵa ortodontııalyq kómek tegin kórsetiledi.
«MÁMS júıesindegi stomatologııalyq kómekti medıtsınalyq saqtandyrý qorynyń derekqoryna engizilgen jáne MÁMS júıesinde jumys isteıtin kez kelgen stomatologııalyq klınıkadan alýǵa bolady. Bizdiń óńirde bul 11 jeke klınıka. Patsıent medıtsınalyq saqtandyrý qorynyń saıtynda tıisti óńird boıynsha qyzmeterdiń bireýin tańdap, oǵan joldamasyz medıtsınalyq kómek alý úshin júgine alady. Kórsetilgen qyzmetterge aqy tóleýdi patsıent qosa oryndaý sharty boıynsha tirkelgen emhana júrgizedi», – dep túsindirdi Álibek Berdibekov.
