Qaraǵandylyqtar MÁMS júıesine jarnany emhanadaǵy termınal arqyly tóleıdi
Qaraǵandy oblysynyń emhanalarynda áleýmettik medıtsınalyq saqtandyrý qoryna jarna tóleýge bolatyn termınaldar ornatyldy. Bul tólem ádisin derbes tóleýshi de paıdalana alady.
Esterińizge sala keteıik, 2020 jyldyń 1 qańtarynan bastap qazaqstandyqtardyń eńbekaqysynan medıtsınalyq saqtandyrý qoryna 1% aýdarylady. Halyqtyń 15 jeńildikti sanaty úshin (11 mln adamnan artyq) qorǵa aı saıyn memleket tóleıdi. Ózin-ózi jumyspen qamtyǵan azamattar (deklaratsııalanbaǵan tabysy bar, JK resimdemeı) biryńǵaı jıyntyq tólem (BJT) tóleıdi. Resmı jumyssyz bolyp tabylmaıtyn (jumyspen qamtý ortalyǵynda esepte turmaıtyn) jáne jeńildikti sanattarǵa kirmeıtin adamdar ár aıdyń basynda óz betinshe medıtsınalyq saqtandyrý úshin ETJ-dan (eń tómengi jalaqy) 5% mólsherinde jarna tóleýi tıis. 2020 jyly bul soma 2125 teńgeni quraıdy. Áleýmettik medıtsınalyq saqtandyrý júıesindegi azamattyń mártebesi jáne medıtsınalyq qyzmetterdiń keńeıtilgen paketine qol jetkizý tólemderdiń turaqtylyǵyna baılanysty bolady.
«Ózine-ózi qyzmet kórsetý termınaldary Qaraǵandy, Jezqazǵan, Balqash jáne oblystyń basqa da eldi mekenderinde ornatylǵan. Medıtsınalyq saqtandyrý qoryna jarnalardy bank kassalary, Qazposhta, Halyq bankiniń termınaldary, Kaspi.kz mobıldik qosymshasy arqyly tóleýge bolady», - dep túsindirdi medıtsınalyq saqtandyrý qorynyń Qaraǵandy fılıaly bóliminiń bas sarapshysy Janar Rakısheva .
