Qaraǵandylyqtar qazaqtyń sary maıyn jeýge keńes berip otyr
ASTANA. QazAqparat - QR Ulttyq ekonomıka mınıstrligi Tutynýshylar quqyqtaryn qorǵaý komıteti sary maıdyń quramyna ósimdik maıyn qosatyn kompanııalardy atady, dep xabarlaıdy QazAqparat tilshisi.
"Ondaı kompanııalar tabıǵı sary maıdy satýy tıis. Ol ónimniń quramynda janýarlar maıy bolýy kerek. Alaıda ishine ósimdik maıyn qosylǵany anyqtaldy. Sol kompanııalardyń ishinde "Vımm-Bıl-Dan" AAQ, "Danon Rossııa" AQ, "Erman", Sibirdiń sút konservileri zaýyty, "Promkonserv" AQ, "Sıbırskıe podvore" AQ, "Verxnıı ýslon" AQ, "Neoprodýkt" AAQ, Gagarın sút konservileri kombınaty, Andrýshevskıı maı zaýyty sııaqty reseılik kásiporyndar, Qyrǵyzstannyń "AQ sút" zaýyty bar, sondaı-aq "Nátıje" JShS, Raıymbek Agro, Fýd master, Maslodel, Merki irimshik zaýyty, "Saıram sút" JShS, Býrn sút kompanııasy, "Altyn dán" JShS, Solnechnyı sút zaýyty, "Adal" kompanııasy, "Úsh tóbe Aıdyn" JShS, "Emılı kompanı" JShS, "Arystan" JShS, "Arlan" JShS, "Aıs plıýs" JShS jáne "Agrofırma" JShS syndy qazaqstandyq fırmalar bar", - deıdi komıtettiń bas sarapshysy Dana Qasqataeva. Osy oraıda buqaralyq aqparat quraldarynyń ókilderi óz ónimin artyq qospasyz shyǵaryp jatqan otandyq kompanııalardy ataýdy surady. Alaıda komıtet músheleri ondaı kompanııalardyń baryn, biraq olardy ataı almaıtyndaryn jetkizdi. Sebebi memlekettik organ ol kásiporyndarǵa jarnama jasaǵandaı bolady. Ondaı tizimdi qoǵamdyq uıymdar júrgizýi tıis.
Osydan keıin jýrnalıster osy saýaldy Qaraǵandy qalasynyń azamattyq keńes tóraǵasy Ermek Ábildınge joldady. Keńes tóraǵasy kóp oılanbastan: "Rasyn aıtsam, men ózim sary maıdy, kádimgideı aýylda qoldan jasalǵan sary maıdy jeımin", - dep qysqa ǵana qaıyrdy.
Aıta keteıik , búgingi baspasóz máslıxatynda Qaraǵandy qalasynyń azamattyq keńes tóraǵasy Ermek Ábildın sapasyz maı ónimderin jarııalady. Al QR Ulttyq ekonomıka mınıstrligi Tutynýshylar quqyqtaryn qorǵaý komıteti tóraǵasynyń orynbasary Nurqan Sádýaqasovtyń aıtýynsha, ótken jyly Qazaqstanda satylatyn 100-den astam maı ónimderiniń quramy talapqa saı emes dep tanyldy. Sonyń basym bóligi - reseılik taýarlar.
