Qaraǵandylyqtar Golovkın-Alvares aıqasyn kóshedegi ekrandardan kóre alady

QARAǴANDY. QazAqparat - Qaraǵandylyqtar WBC, WBA jáne IBO nusqalary boıynsha álem chempıony qazaqstandyq Gennadıı Golovkınniń meksıkalyq Saýl Alvarespen revanshyn qala kóshelerinde ornatylatyn LED-ekrandardan kóre alady. Bul týraly oblys ákimdiginen málim etti, dep habarlaıdy QazAqparat.

Alyp ekrandar «Kenshiler» mádenıet saraıynyń, «Jańa Maıqudyq» mádenıet úıiniń jáne Dostyq úıiniń (Kenshiler dańǵyly,64) aldyndaǵy alańdarda ornatylady. LED-ekrandar tikeleı efırge jeksenbi, 16 qyrkúıek kúni tańǵy saǵat 7.30-da qosylady.

Aldyn ala boljam boıynsha, Golovkın men Alvares rıngke saǵat 8.00 men 8.30 aralyǵynda shyǵady.

Sondaı-aq qazaqstandyqtar jekpe-jektiń tolyq kórsetilimin QazSport jáne Qazaqstan telearnalarynan tamashalaı alady.

Las-Vegastaǵy T-Mobile arenada GGG-«Kanelo» aıqasyn qosqanda barlyǵy segiz jekpe-jek josparlanǵan. Onyń ishinde Nıkaragýanyń tórt salmaq boıynsha burynǵy álem chempıony Roman Gonsales pen meksıkandyq Moıses Fýentestiń jekpe-jegi, orta salmaqtaǵy IBF burynǵy chempıony kanadalyq Davıd Leme men ırlandyq Gerı O'Sallıvananyń, sondaı-aq birinshi orta salmaqtaǵy WBO chempıony meksıkalyq Haıme Mýngýıı men kanadalyq Brendon Kýktyń jekpe-jegi. Anderkarttaǵy kezdesýler HBO jáne shetel telearnalarynda (aqyly kórsetilim) 16 qyrkúıekte Astana ýaqytymen tańǵy 6:00-de bastalady.

Aıta keteıik, Gennadıı Golovkın bul jarysqa óziniń barlyq belbeýlerin tigip otyr. Sonymen qatar boksshylar The Ring chempıony ataǵy men WBC arnaıy belbeýine talasatyn bolady.

Eske salaıyq, qos boksshynyń alǵashqy jekpe-jegi 2017 jyldyń qyrkúıeginde Las-Vegasta ótken edi. Alaıda tóreshiler jeńimpazdy anyqtaı almaı, aıqas teń aıaqtaldy.