Qaraǵandylyqtar endi avtobýstarda elektrondy kitap oqı alady

QARAǴANDY. QazAqparat – Qaraǵandynyń 60 avtobýsynda elektrondy kitap oqý múmkindigi paıda boldy. Búgingi tańda elektrondy kitaphanalar 22 qoǵamdyq kólikte jabdyqtalǵan. Kitap oqý úshin jolaýshylardyń smartfondary ınternetke qosýly bolsa jetkilikti, dep habarlaıdy QazAqparat tilshisi.

Avtobýstardaǵy elektrondy kitaphana qalalyq ákimdiktiń qoldaýymen «Jol ústindegi kitaphana» jobasy aıasynda jabdyqtalǵan. Ázirge QR kodtary boıynsha kitap oqý optsııasy alty baǵyttaǵy 22 avtobýsta qol jetimdi – 65, 5, 1, 70, 43, 118. Qazaq, orys jáne shetel ádebıetteriniń týyndylarymen tanysý úshin jolaýshylarǵa avtobýs salonynyń ortalyq bóligindegi stıkerlerde ornalastyrylǵan QR-kodty skanerleý jetkilikti.

«Jyljymaly kitaphana kórkem ádebıetti oqýdy nasıhattaý úshin jabdyqtalǵan. Qazaq, orys jáne sheteldik klassıka sekildi úsh bólimnen turatyn kitapty tańdaý úshin jolaýshy silteme boıynsha ótý kerek. Shyǵarmalardyń ishinen M. Áýezovtiń «Kókserek», A. Qunanbaıulynyń «Eskendir», A. S. Pýshkınniń ertegileri, Artýr Konan Doıldiń «Joǵalǵan álem» jáne basqa da kitaptardy tańdaýǵa bolady. Jobaǵa baǵyttary uzaq jáne jolaýshylar aǵyny mol marshrýttar tartyldy», – deıdi qala ákimdiginiń baspasóz qyzmeti.

Jaqyn arada elektrondy kitaphanalar 13 marshrýttaǵy 60 qalalyq avtobýsta bolady. Nómiri 65, 5, 1, 70, 43, 118-den basqa, qosymsha 40, 53, 33, 146, 56, 41, 19 avtobýstarda bar. Kitaphananyń tsıfrlyq muraǵatynda barlyǵy 41 týyndy bar. Onyń ishinde 21 – qazaq klassıkasy, 14 – sheteldik jáne 6 – orys klassıkasy.