Qaraǵandylyqtar aımaqtarǵa jas mamandardy tartýdyń jańa ádisin oılap tapty

QARAǴANDY. QazAqparat – Qaraǵandylyq sheneýnikter jas dárigerlerdi aımaqtarǵa tartýdyń jańa ádisin oılap tapty. Óńirge «Dıplommen aýylǵa» baǵdarlamasy boıynsha keletin medıtsınalyq joǵary oqý oryndarynyń túlekterine memleketten bolashaqta alatyn páterleriniń dızaıny men jobasyn tańdaý múmkindigi beriledi, dep habarlaıdy QazAqparat tilshisi.

Bolashaq dárigerlerdiń tańdaýyna 3 úıdegi 100 páter usynylady. Olar Qarqaraly, Temirtaý jáne Qarajalda ornalasqan. Ótinishter barlyq mamandardan qabyldanady. Alaıda basymdyq akýsher-gınekologtarǵa, neonatologtarǵa, ınfektsıonısterge jáne jalpy tájirıbe dárigerlerine beriledi.

«Bıylǵy jyl - Jastar jyly dep jarııalanǵan soń biz bolashaq dárigerlerge yńǵaıly bolý úshin barlyq múmkindikterdi jasap otyrmyz. Turaqty jumyspen qosa túlekterge 100 AEK kóleminde áleýmettik qoldaý kórsetiledi. Jáne de taǵy bir bonýs - olar bolashaq páterleriniń jobalaýyn ózderi tańdaıdy»,- dep atap ótti Qaraǵandy oblysynyń densaýlyq saqtaý basqarmasynyń jetekshisi Erjan Nurlybaev.

Densaýlyq saqtaý basqarmasynan atap ótkendeı, páterlerindegi jóndeý jumystary kezinde aýyldyq dárigerlerge ýaqytsha baspana jalǵa beriledi. Ótinish berý úshin aýdandyq ákimdikke baryp, barlyq qajetti qujattardy jınaý kerek. Ótinishter qaralǵan soń bolashaq dárigerler páter dızaıny men jobasyn aqyldasý úshin áńgimelesýge shaqyrylady. Mundaı nıet bildirgen jas mamandarǵa asyǵý kerek, sebebi jańa baspanaǵa qol jetkizgisi keletinder sany kún sanap artýda.