Qaraǵandylyqtar arasynda ajyrasý azaıǵan
QARAǴANDY. QazAqparat - Jyl basynan bergi 5 aıdyń ishinde Qaraǵandy oblysynda 2 106 ajyrasý faktisi tirkelgen. Bul kórsetkish byltyrǵy osy kezeńde 2116 bolǵan. Ajyrasý kólemi 0,5 %-ǵa qysqardy, dep habarlaıdy QazAqparat tilshisi.
«Qaraǵandy oblysynda 5 aıdyń ishinde AHAT organy 3 277 neke men 2 106 ajyrasý faktisin tirkegen. Ótken jylmen salystyrǵanda qıylǵan nekeler sany 0,1 %-ǵa artyp, ajyrasý kórsetkishi 0,5 %-ǵa qysqarǵan», - deıdi Qaraǵandy oblystyq statıstıka departamenti basshysynyń orynbasary Sáýle Komýtova agenttiktiń joldaǵan saýalyna.
Aıta keteıik, 2018 jyldyń qańtar-mamyr aralyǵynda 1000 nekege shaqqanda 358 ajyrasýdan kelgen. Olardyń ishinde 20-19 jas aralyǵyndaǵy jastar kóp tirkelgen. Sonyń ishinde 25-29 jas aralyǵyndaǵy erlerdiń úlesi 33% qurap otyr. Al, áıelder arasynda 20-24 jas aralyǵynda arýlar jıi neke qıdyratyn bolyp shyqty, olardyń úlesi 39,4 %-dy qurady. 18 jasqa deıingi jasóspirimder arasynda 4 jigit pen 118 qyz bala, 60 jas jáne odan egde jastaǵylardan 176 er adam men 122 áıel nekege otyrǵan.
«Ajyrasýdyń eń kóp bóligi 30-34 jas aralyǵyndaǵy er adamdar jáne 25-29 jas aralyǵyndaǵy áıelder arasynda tirkelgen. Olardyń úlesi sáıkesinshe 22,3 % jáne 23,1 % quraıdy. 60 jas jáne odan úlken jastaǵy 180 er adam men 130 áıel ajyrasqan», - dep atap ótti S. Komýtova.
Budan bólek, jalpy sońǵy 5 jylda oblysta ajyrasý sany azaıyp keledi.
Vedomstvoda atap ótilgendeı, 2017 jyly Qaraǵandy oblysy ajyrasý kólemi boıynsha Almaty, Almaty oblysy jáne Túrkistan oblystarynan keıin 4-orynda bolǵan. Ol 1000 adamǵa shaqqanda 3,81 ajyrasýdan kelip, elimiz boıynsha Pavlodar oblysynan keıin ekinshi oryn alǵan.
Byltyr ajyrasqan juptardyń basym bóligi 5-9 jyl birge turǵan. Olardyń úlesi ajyrasqan juptardyń jalpy sanynyń 25,8 % quraǵan. 20 jastan keıingi ajyrasý kólemi 14,7 % bolǵan.
