Qaraǵandylyqtar aq kóbelekterdiń qaptap ketkenin aıtyp shaǵymdandy

QARAǴANDY. QazAqparat – Qaraǵandy qalasynyń turǵyndary usaq kóbelektiń qaptap ketkenine shaǵymdanyp jatyr. Olar saıajaılar men baqtarda, baý-baqshalarda, tipti ortalyq mádenıet jáne demalys saıabaǵynda da paıda bolǵan. Baǵbandar bul jándikter ósmdikterge zııan keltiredi dep otyr, dep habarlaıdy QazAqparat tilshisi.

Sońǵy aptada Qaraǵandy men seriktes qalalardyń turǵyndary áleýmettik jelilerde kóbelekterdiń ósimdikter men jemis-jıdekterge keltirip jatqan zııany jaıly jarysa jazyp, shaǵym aıtyp jatyr.

Al, keı turǵyndar kerisinshe, kóbelekterden esh qaýip joq deıdi.

Usaq kóbelekter Qaraǵandynyń ortalyq saıabaǵynda da paıda boldy. Qanatty jándikter adamdarǵa esh qaýip tóndirmegenimen, ósimdikterge óz zııanyn tıgizýde.

Turǵyndar kóbelekti ósip turǵan gúlge qonyp, ony qyrqyp tastaıdy dep alańdaýly.

«Kez kelgen janýardyń, sonyń ishinde jándikter ótken jylǵa qaraǵanda edáýir kóbeıip otyr. Sonymen qatar usaq kóbelekterdiń jypyrlap qaptap ketýi baıqaldy. Olar eshqandaı qaýip tóndirmeıdi. Ázirge olar zııansyz dep aıtar edim», - deıdi ekolog Dmıtrıı Kalmykov.

Baǵbandar aýylsharýashylyq taýar óndirýshilerden jándikterdi joıýǵa arnalǵan hımııalyq zattar men arnaıy preparattardy kóptep satyp alý jóninde usynys aıtty.

Mamandardyń aıtýynsha, ósimdikterdi tez arada dárilep, jándikterdi ýlap, joıý kerek.

Vıdeodan alynǵan kadr