Qaraǵandylyqtar Abaı kúnin atap ótti
QARAǴANDY. QazAqparat – Qaraǵandy oblysy Abaı Qunanbaevtyń 176-jyldyǵyn atap ótýde, dep habarlaıdy QazAqparat.
Aqynnyń týǵan kúni – 10 tamyz Qazaqstanda merekelik data bolyp taǵaıyndaldy. Abaı kúnine oraı Qaraǵandyda uly oıshyldyń eskertkishine gúl shoqtary qoıyldy. Saltanatty sharaǵa oblys ákimi Jeńis Qasymbek, mádenıet maıtalmandary, ǵalymdar jáne qoǵam qaıratkerleri qatysty.
«Abaı kúnin atap ótý biz úshin óte mańyzdy. Sebebi Abaı – búgingi jáne bolashaq kúnniń maqtanyshy men fılosofııasy. Bul tabıǵat, adam, onyń psıhologııasy týraly jan-jaqty bilim. Osy oılardyń barlyǵy tehnologııalyq progress pen tsıfrlandyrýǵa qaramastan eshqashan mańyzdylyǵyn joǵaltpaıdy. Al adamnyń adamgershiligi – eń basty qundylyq», – deıdi Qaraǵandy oblysy QHA múshesi, Evreı mádenı ortalyǵynyń tóraǵasy Vılen Molotov-Lýchanskıı.
Abaı erekshe daryn ıesi, aqıyq aqyn, mýzykant, aǵartýshy, qoǵam qaıratkeri boldy. Onyń «Qara sózderi» qazaq ádebıetiniń injý-marjany, tuńǵıyq tereń oıdyń kózi bolyp tabylady.
«Búgin – búkil qazaq halqy úshin uly merekelerdiń biri. Abaı kúni biz bolashaqty oılaýmen qatar, bizdiń is-áreketterimizdi, búginimizdi túsinýimiz kerek. Men halqymyzdy Abaı kúnimen quttyqtaımyn. Abaıdyń danalyǵy búgingi jáne bolashaq urpaqtyń álippesine aınalǵanyn qalaımyn», – dep atap ótti belgili metsenat Bekzat Altynbekov.
Sonymen qatar oblysta Abaı kúnine oraı kórmeler, beınesabaqtar, dóńgelek ústelder, baıqaýlar, ǵylymı-tanymdyq konferentsııalar jáne de basqa sharalar ótýde. Karantın shekteýlerine baılanysty is-sharalardyń basym bóligi onlaın-formatqa kóshirilgen.
Qaraǵandy oblysynda uly aqynnyń úsh eskertkishi jáne tórt bıýsti ornatylǵan. Qala, aýdan jáne eki aýyldyq mekenge, úsh prospektke, seksen kóshege, jeti oqý ornyna, eki mádenıet úıine Abaı esimi berilgen.
