Qaraǵandylyq jeti jyl ótken soń baýyryn qystaýdan tapty
QARAǴANDY. QazAqparat – Qaraǵandylyq 2012 jyly áıelimen urysyp, úıinen ketip qalǵan baýyryn tapty, dep habarlaıdy QazAqparat tilshisi.
Onyń 51 jastaǵy aǵasyn Qaraǵandy oblysy Jańaarqa aýdanyndaǵy qystaýda bireýdiń zańsyz ustap otyrǵany týraly habardy oǵan messendjermen belgisiz adam jibergen. Osy jyldyń 3 qyrkúıeginde Jańaarqa aýdandyq polıtsııa bólimine 34 jastaǵy er adamnyń qystaýlardyń birinde 2015 jyldyń tamyzynan beri 51 jastaǵy er adamdy zańsyz ustap otyrǵany týraly habar túsken.
Tekserý barysynda er adamnyń 2012 jyly jubaıymen urysyp, úıinen ketip qalǵany jáne sodan keıin spırttik ishimdik iship, týystarymen baılanysynyń úzilgeni belgili boldy. 27 tamyzda WhatsApp messendjerimen belgisiz bireý onyń baýyryna aǵasynyń Jańaarqa aýdanyndaǵy sharýa qojalyqtarynyń birinde jumys istep otyrǵany týraly habarlaǵan. Sodan keıin ol polıtsııaǵa osy derek boıynsha ótinish túsirip, aǵasyn qystaýlardyń birinde zańsyz ustap otyrǵanyn málimdegen.
«51 jastaǵy er adam 2012 jyly jubaıymen urysyp, úıinen ketip qalǵanyn túsindirdi. Sodan keıin spırttik ishimdik iship, Qaraǵandy qalasy Maıqudyqtaǵy kóshelerdiń birinde turǵan. Ol sol jerde Tilegen esimdi azamatpen tanysyp, keıin jumys isteý úshin qystaýǵa barǵan. Ol óz erkimen jumys isteý úshin kelgen, alaıda ony eshqaıda jibermeı, ustap otyrǵandyǵyn aıtty», - dep habarlady Qaraǵandy oblystyq polıtsııa departamentiniń baspasóz qyzmetinen.
Óz kezeginde atalǵan qystaýdyń ıesi 51 jastaǵy er adamnyń 2017 jyldyń mamyrynda tamaq surap kelip, keıin osy sharýashylyqta jumys isteýge qalǵanyn túsindirdi. Áńgimelesý barysynda er adam esin joǵaltqanyn aıtty.
Qazir istiń mán-jaıyn anyqtaý úshin QR QK 126-baby 1-bóligi boıynsha (Zańsyz bas bostandyǵynan aıyrý) qylmystyq is tirkeldi.
