Qaraǵandylyq jeti kúndik jaıaý marafonǵa attandy

QARAǴANDY. QazAqparat – Qaraǵandyda «Jaıaý» tanymdyq týrızm jobasy bastaldy. Onyń jetekshisi Ashat Qajytaı jeti kúnde 333 shaqyrymdy jaıaý júrip ótýdi josparlap otyr, dep habarlaıdy QazAqparat tilshisi.

Jol boıynda ol kórikti jerler men jergilikti salt-dástúrdi vıdeoǵa túsirip otyrady. Saıahatshy búkil beıneni áleýmettik jelide taratady.

«Jobanyń bes baǵyty bar. Birinshisi – Qaraǵandy-Qyzylaraı. Bul sapar 24 mamyrda Aqsorań taýyna shyǵyp, tý ornatýmen aıaqtalady. Kelesi baǵyt – Qaraǵandy-Ulytaý jáne t. b. Jaıaý marafon kúzde Túrkistanda aıaqtalady. Meniń jobamnyń negizgi maqsaty – bizdiń jerimizdiń tarıhı jáne mádenı qundylyǵyn kórsetý. Sapar barysynda kezdesetin ár aýyldyń ótkeni men búgini týraly aıtyp, qyzyqty adamdardyń portretin jasaǵym keledi. Sońǵy ýaqytta tanymal bolyp kele jatqan eko jáne etnotýrızmge basa nazar aýdaramyn. Bir kúnde 56–60 shaqyrymnan ótip, jeti kúnde Qyzylaraıǵa jetemin dep oılaımyn», – deıdi Ashat Qajytaı.

Týrıstik joba Qazaqstan Táýelsizdiginiń 30 jyldyǵyna arnalǵan.

«Birinshi kezekte bul bastama buqaralyq sportty nasıhattaýǵa yqpal etetin bolady. Ekinshiden, bul turǵyndardy týǵan ólkeniń tarıhı oryndary men jeke tulǵalarymen tanystyrýdyń biregeı tásili», – dep sanaıdy Saryarqa aqparat medıaholdınginiń dırektory Qambar Ahmetov.