Qaraǵandylyq jastarǵa bıýdjetten jeńildetilgen nesıe beriledi

QARAǴANDY. QazAqparat – Qaraǵandy oblysynda jastar bastamalaryna bıýdjetten kredıt berý iske asyryla bastaıdy. Óńir kásipkerlerin qoldaý úshin jalpy somasy 1 mlrd 620 mln teńgege 324 nesıe bólindi, dep habarlaıdy QazAqparat tilshisi.

Jańa baǵdarlamanyń bastamashysy – QR Eńbek jáne halyqty áleýmettik qorǵaý mınıstrligi. Bıýdjetten nesıe berýdi Qaraǵandy oblysynyń Jumyspen qamtýdy úılestirý jáne áleýmettik baǵdarlamalar basqarmasy men oblys ákimdigi baqylaıtyn bolady. Nesıeler Agrarlyq nesıe korporatsııasy arqyly beriledi.

Jeńildetilgen nesıe 35 jasqa deıingi, jeke kásipker retinde keminde 5 jyl jumys ótili bar jastarǵa qoljetimdi. Kepildik múliktiń bolýy mindetti. Bul rette bıznespen kez kelgen salada aınalysýǵa bolady.

Nesıe 5 jylǵa, jyldyq 2,5% beriledi. Al mal sharýashylyǵy salasyndaǵy jobalarǵa nesıe berý merzimi – 7 jylǵa deıin.

«Qujattar men bıznes-jospardy úmitkerler Agrarlyq nesıe korporatsııasyna usynýy tıis. Bul nesıege qyzyǵýshylyq tanytqandar kóp bolady dep kútemiz. Ár kandıdattyń múmkindikterin jan-jaqty qarastyratyn arnaıy komıssııa qurylady. Qajettilik boıynsha belgili bir salanyń sarapshylaryn shaqyramyz», – dedi Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova.

Búkil el boıynsha bıýdjettik nesıeleýdi iske qosý naýryz aıyna josparlanyp otyr.