Qaraǵandylyq jastardy jumysqa ornalastyrý jospary aıtyldy

QARAǴANDY. QazAqparat – Qaraǵandy oblysynda oqý oryndarynyń túlekteri men NEET sanatyndaǵy jastardyń jumyssyzdyǵy máselesi «Jastar praktıkasy» jáne «Alǵashqy jumys orny» jobalarynyń kómegimen sheshiledi. Bul týraly Óńirlik kommýnıkatsııalar qyzmetinde ótken onlaın-brıfıngide aıtyldy, dep habarlaıdy QazAqparat tilshisi.

Bıyl atalmysh baǵyttar boıynsha 1 myńǵa jýyq adamdy jumyspen qamtý josparlanyp otyr.

«Bizdiń óńir jastary úshin negizgi áleýmettik másele jumysqa ornalastyrý bolyp tabylady. Jumyspen qamtý úshin «Jastar tájirıbesi», «Alǵashqy jumys orny», «Jasyl el» baǵdarlamalary sııaqty jobalar jumys isteıdi», — dep atap ótti Jastar saıasaty máseleleri basqarmasynyń basshysy Birjan Álimjanov.

Jastar praktıkasy ýaqytsha jumys oryndaryn qurý arqyly uıymdastyrylady. Ol oqýyn aıaqtaǵanyna úsh jyl bolmaǵan jáne 29 jastan aspaǵan jumyssyz túlekterge arnalǵan.

Úmitkerler úshin alǵashqy eńbek ornyn jumys berýshi qurady. Jalaqyny memleket sýbsıdııalaıdy. Joba qatysýshysy 29 jastan aspaǵan jastar, onyń ishinde jumys tájirıbesi men bilimi joq NEET sanatyndaǵy jastar bolyp tabylady.

«Bıyl osy jobalardaǵy sharttar ózgertildi. Osylaısha, «Jastar tájirıbesine» qatysý uzaqtyǵy 6 aıdan 12 aıǵa deıin jáne eńbekaqy mólsheri 25-ten 30 AEK-ke deıin ulǵaıtyldy. 2022 jyly praktıkamen 721 adamdy qamtý josparlanýda. «Alǵashqy jumys ornynda» da qatysý uzaqtyǵy 12 aıdan 18 aıǵa deıin jáne eńbekaqyny sýbsıdııalaý mólsheri 20-dan 30 AEK-ke deıin ulǵaıtyldy. Osy joba boıynsha bıyl 238 adam jiberýdi josparlap otyrmyz», — dedi Jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Muhtar Tóleý.

Aıtylǵan baǵyttar boıynsha jumysqa ornalasý úshin Jumyspen qamtý ortalyqtaryna nemese enbek.kz/ elektrondyq eńbek bırjasyna júginý qajet.

Esterińizge sala keteıik, «Jastar tájirıbesi» men «Alǵashqy jumys orny» barlyq menshik nysanyndaǵy kásiporyndar men uıymdarda uıymdastyrylady. Bul rette salyq jáne áleýmettik aýdarymdardy turaqty júrgizetin, jalaqysy boıynsha bereshegi joq jáne bir jyldan astam qyzmet isteıtin jumys berýshiler qatysýǵa jiberiledi.