Qaraǵandylyq jastar sadaq atýdan respýblıkalyq týrnırde jeńiske jetti

QARAǴANDY. QazAqparat – Buqar Jyraý aýdanynyń Botaqara kentinde sadaq atýdan elimizdiń ashyq týrnıri ótti. Oǵan Nur-Sultan qalasynan, Qaraǵandy jáne Mańǵystaý oblystarynan 50-ge jýyq sadaqshy qatysty. Qaraǵandylyqtar 11 jasqa deıingi jáne 12 jastan 15 jasqa deıingi jas sanatynda jeńimpaz atandy, dep habarlaıdy QazAqparat tilshisi.

Atalmysh is-shara ulttyq sport túrlerin damytýǵa baǵyttalǵan.

«Osyndaı aýqymdaǵy sadaqshylar týrnıri bizde alǵash ret bolyp otyr. Biz ony laıyqty deńgeıde ótkize alǵanymyzǵa qýanyshtymyz. Qatysýshylar bes jas sanaty boıynsha jarysty. Olar – 11 jasqa deıingi qyzdar men uldar, 12 jastan 15 jasqa deıingi jáne 16 jastan 18 jasqa deıingi jasóspirimder, 18+ erler men áıelder», – dedi týrnır uıymdastyrýshysy Aıdarhan Ábdirahmanov.

11 jasqa deıingi jas sanatyndaǵy qatysýshylarǵa 5 jebe berildi. Fınalda olar bir mınýtta 15 metrden nysanaǵa tııýi kerek edi. Belgilerge neǵurlym kóbirek oq tıse, ball soǵurlym joǵary bolady.

Jasóspirimder úshin bul qashyqtyq 25–30 metrge deıin ulǵaıtyldy. Al eresekter nysana núktesine 35–40 metr qashyqtyqtan tııýi kerek boldy.

«Týrnır joǵary deńgeıde ótti. Bizde dástúrli sadaq atýdy jandandyratyn kóptegen adamdar bar ekenine qýanyshtymyn. Jarysqa qatysýshylar jaqsy nátıjeler kórsetti. Men týrnırge Nur-Sultan qalasynan qatysýshylardy alyp keldim jáne ózim de «Erler 18+» sanatyndaǵy jarysqa qatystym. Ekinshi oryn ıelendim», – dedi Sadaq aty respýblıkalyq dástúrli sadaq atý federatsııasynyń vıtse-prezıdenti Dıas Ahmetov.

Qaraǵandylyqtar Anastasııa Kovaleva (11 jasqa deıingi) jáne ıAroslav Grıgorev (12–15 jas), sondaı-aq Nur-Sultannan kelgen sadaqshylar Ahmadı Baltobek (16–18 jas), Ádemi Qajyǵalıeva jáne Azamat Nurtaev (18+) týrnır jeńimpazdary atandy.

Olar medal-gramota jáne syılyqtarmen marapattaldy.