Qaraǵandylyq jastar avtobýs júrgizýshilerine maska taratty

QARAǴANDY. QazAqparat – Qaraǵandyda jas volonterler men Analar keńesiniń músheleri maska tigý jáne olardy qala kóshelerinde adamdar men qoǵamdyq kólik júrgizýshilerine taratý boıynsha aktsııa uıymdastyrdy, dep habarlaıdy QazAqparat tilshisi.

Mereke kúnderi Qazaqstan halqy Assambleıasy janyndaǵy «Jańǵyrý joly» jastar qozǵalysy aımaqtyq shtabynyń ókilderi men volonterler qala kóshelerinde ótip bara jatqan adamdar men qoǵamdyq kólik júrgizýshilerine medıtsınalyq maska taratty.

Qaraǵandy oblysynyń QHA Analar keńesiniń áıelderi mata satyp alyp, betperde tigýde, al jastar kóshege shyǵyp, ol ónimderdi taratyp júr.

«Osy bir qıyn kezeńde bastama kóterip, jerlesterine kómektesýge eriktiler shyqpaǵanda, kim shyǵady? Biz búgin tek kóshede kezdesken adamdarǵa ǵana emes, sonymen qatar qoǵamdyq kólik júrgizýshilerine de maska tarattyq. Sebebi olar kún saıyn kóp adammen baılanysta bolady», - deıdi jastar.