Qaraǵandylyq jas sportshy álem chempıony atandy
QARAǴANDY. QazAqparat – Qaraǵandy oblystyq keshendi sport mektebiniń tárbıelenýshisi Borıs Býkatka jasóspirimder men ıýnıorlar arasynda paýerlıftıngten álem chempıony atandy, dep habarlaıdy QazAqparat tilshisi.
Jarys Rýmynııanyń Oradıa qalasynda ótti. Dodada 33 eldiń sportshylary básekelesti.
Halyqaralyq dárejedegi sport sheberi , 18 jasar Borıs Býkatka 59 kelige deıingi salmaqta óner kórsetti.
Jalpy nátıjesi 540 kg quraǵan qaraǵandylyq altyn aldy. Ol barlyq túrler boıynsha birinshi orynǵa ıe boldy: skvat – 205 kg, press – 130 kg, dedlıft – 205 kg.
Jeńimpazdyń tálimgeri – Qaraǵandy oblysynyń paýerlıftıngten aǵa jattyqtyrýshysy Irına Deıneka.
« Men altynshy jyl osy sport túrimen aınalysamyn. Bul sportqa meni ákem – paýerlıftıngten halyqaralyq dárejedegi sport sheberi alyp keldi. Nátıjege kóńilim tolmady. Kóp nárse isteı alar edim. Árqashan jarystan keıin men kórsetken ónerimdi taldap, bolashaqqa sabaq alamyn. Bul meniń ǵana jeńisim emes, jattyqtyrýshylarymnyń eńbegi», - dep bólisti álem chempıony.
