Qaraǵandylyq jas shahmatshy halyqaralyq týrnırde birinshi oryn aldy
QARAǴANDY. QazAqparat – Qaraǵandylyq shahmatshy Danııal Sapenov Serbia Chess Open – 2021 halyqaralyq týrnırinde altyn júlde jeńip aldy. On eki jasar sportshy jalpy 9 upaıdyń 8-in jınady. Áýesqoılar arasyndaǵy topqa 30 elden 194 shahmatshy qatysty, dep habarlaıdy QazAqparat tilshisi.
Danııal 7 jasynan bastap shahmatpen aınalysady. Anasy ony úıirmege bastaýysh synyp muǵaliminiń keńesi boıynsha aparǵan.
«Muǵalim shahmat matematıkaǵa kómektesetinin aıtty. Súıikti shahmatshym – Anatolıı Karpov. Meniń alǵashqy jattyqtyrýshym – Gennadıı Pak. Qazir meni Vıktor Maksımenko jattyqtyrady. Onymen birge men Serbia Chess Open týrnırine bardym. Qıyn boldy, túrli elderdiń qatysýshylarymen oınadym. Eń aýyr partııa túrik shahmatshysymen boldy jáne ol bes saǵatqa sozyldy», – deıdi Danııal.
Shahmattan KSRO sport sheberi Vıktor Maksımenko osyndaı iri jarystarda jeńiske jetý shahmatshynyń taǵdyryndaǵy mańyzdy kezeńderdiń biri dep sanaıdy.
«Qaraǵandy oblysynyń Shahmat boıynsha aǵa jattyqtyrýshysy retinde bizdiń tárbıelenýshimizdiń osyndaı ókildik týrnırde birinshi orynǵa ıe bolǵanyna óte qýanyshtymyn. Biz Danııalǵa úlken úmit artamyz. Serbııalyq týrnırde birinshi oryn bir nárseni bildiredi: balalar shahmatynyń ótkelinen ótti, úlkenderge aýysatyn kez keldi. Bul boıynsha biz jaqyn arada jumys isteıtin bolamyz», – deıdi FIDE sheberi Vıktor Maksımenko.
Danııaldyń ata-anasy onyń sportqa degen qushtarlyǵyn qoldaıdy.
«Onyń alǵashqy sport túri – júzý. Biz ony dene shynyqtyrý úshin berdik. Sodan keıin ol thekvondoǵa bardy. Bizdiń oıymyzsha, bul sport túri ózin qorǵaı alý úshin kerek. Al, sodan keıin shahmat. Oqýdyń birinshi jylynda ol birden tórt synyptan ótti», – deıdi balanyń anasy Aıman Sapenova.
Danııal Qazaqstan chempıonatynda birinshi oryn alǵannan keıin, grossmeısterler onymen aınalysa bastady. Bul bizdiń jerlesimiz Rýstam Hýsnýtdınov jáne Qazaqstan erler quramasynyń aǵa jattyqtyrýshysy Pavel Kotsýr. Aptasyna úsh ret ol árqaısysymen aınalysady. Sonymen qatar, aptasyna tórt ret bala Vıktor Maksımenkomen oınaıdy.
Danııaldyń ákesi Qanat Sapenov uly týraly qaısar, shydamdy, eńbekqor jáne maqsatqa umtylǵan sportshy ekenin aıtady.
«Birneshe jyl buryn ol óziniń bolashaǵyn ózi tańdady. Kásibı shahmatshy bolǵysy keldi. Búginde ol qalanyń úsh dúrkin chempıony, oblystyń úsh dúrkin chempıony, 2020 jáne 2021 jyldardaǵy respýblıka chempıony, eki kezeńdegi Qazaqstan Kýbogynyń ıegeri. Halyqaralyq jarystarǵa sátti qatysady. Bolashaqta ol halyqaralyq sheberdi alady», – deıdi Qanat Sapenov.
Tamyz aıynda Danııal Sapenov Máskeýge Mıhaıl Botvınnık memorıalyna barady.
