Qaraǵandylyq jas mýzykanttar Frantsııa jáne Rımde óner kórsetti
QARAǴANDY. QazAqparat - Qaraǵandylyq jas mýzykanttar mamyr aıynyń basynda Eýropa qalalaryn aralady. Qaladaǵy mýzyka mektebiniń tárbıelenýshileri Kann (Frantsııa) jáne Rım (Italııa) qalalarynda «Daryndylar otshashýy» halyqaralyq jobasy aıasynda konkýrsqa qatysty. Bul týraly QazAqparat oblys ákimdiginiń baspasóz qyzmetine silteme jasap habarlaıdy.
Sapardy Qaraǵandy ákimdiginiń qoldaýymen bilim bólimi uıymdastyrdy.
Qaraǵandylyqtar halyqaralyq konkýrsta Qazaqstannyń namysyn qorǵady. 20 qatysýshynyń 15-i 1-dárejeli dıplommen marapattaldy. Tórt úmitker ekinshi oryn jáne bireýi - úshinshi oryn aldy.
Budan buryn habarlanǵandaı, Qaraǵandy ákimdigi halyqaralyq konkýrstarda daryndy balalardyń saparlaryn qarjylandyrýdy bastady. 2018 jyly qalalyq bıýdjetten osy maqsatta 13 mln teńge bólindi. Osy aqshanyń esebinen qosymsha bilim berý uıymdarynyń 40 tárbıelenýshisi shetelge saparlaı alady.
