Qaraǵandylyq jas kásipker týrıstik oryndar týraly málimet beretin karta ázirlep jatyr
Ánýar Nurjanov Qaraǵandy memlekettik-tehnıkalyq ýnıversıtetin «Geodezııa jáne kartografııa» mamandyǵy boıynsha bitirgen. Óz mamandyǵymen eki jyl jumys istep, «Atameken» ulttyq kásipkerler palatasynyń «Jas kásipker» baǵdarlamasy arqyly jeke kásibin bastaǵan.
«Jas kásipker» baǵdarlamasyna ótinim bergen soń, úsh aptalyq kýrsqa qatystym. Onda bıznes-jospar qurý men kásipkerliktiń negizderin úıretti. Oqý sońynda bıznes-jospar qorǵap, qarajatty qaıda jumsaıtynymdy túsindirdim. Nátıjesinde 505 myń teńge qaıtarymsyz grant jeńip aldym», - dedi Á. Nurjanov.
Qyrkúıek aıynda jas kásipker geoaqparattyq júıeler salasynda óz jumysyn bastady. Ondaǵy mańyzdy jobalardyń biri - týrıstik oryndar týraly aqparat beretin karta.
«Biz karta ázirleýmen aınalysamyz. Bul Gýgl, ıAndeks kartalarǵa uqsaýy múmkin, biraq bizdiń kartada navıgatordan bólek, týrıstik oryndarǵa basymdyq beriledi. Týrıstik nysandar, kıeli oryndar, tarıhı eskertkishter týraly tolyq aqparat alýǵa bolady. Mobıldi qosymsha ázirleý týraly Mádenıet jáne sport mınıstrligine hat joldadyq. Bul týrızmdi damytý úshin, jeke saıahatshylar úshin yńǵaıly bolmaq», - deıdi jas kásipker.
Eske sala ketsek, QR Tuńǵysh Prezıdenti Nursultan Nazarbaev 2019 jyldy Jastar jyly dep jarııalaýdy usynǵan bolatyn.
Jastar jylynyń ashylý rásiminde N. Nazarbaev «Atameken» ulttyq kásipkerler palatasyna «Jas kásipker» baǵdarlamasyn ázirleýdi tapsyrdy.
«Jas kásipker» arqyly kolledjder men ýnıversıtet túlekteri, 18-29 jastaǵy jumys istegisi keletin jastar, jeke kásip ashqysy keletinder, jumys istegisi keletin múmkindigi shekteýli jandar jáne ózin-ózi jumyspen qamtyǵandar men frılanserler bilimin jetildire alady.
