Qaraǵandylyq jas kásipker qymyz ben saýmal óndiredi
QARAǴANDY. QazAqparat – Qaraǵandy oblysy Buqar jyraý aýdanynyń jas malshysy Almaz Tańǵyshbaev tórt jyldan beri sút ónimderin óndirýmen aınalysyp keledi. Bıznesti keńeıtý týraly kópten oılanǵan, biraq qarjysy jetispegen. Ótken jyly ol jastar kásipkerligin qoldaý jáne damytýǵa arnalǵan Qaraǵandy oblysy ákiminiń grantyna ıe boldy, dep habarlaıdy QazAqparat tilshisi.
Bir mıllıon teńge kólemindegi barlyq qarajat birden qymyzdy shaıqaýǵa arnalǵan apparattarǵa jumsaldy. Almaz tórt kúbi satyp aldy: ekeýi elektr jelisi arqyly, ekeýi qolmen sapyrýǵa arnalǵan.
«Bul kásibimiz úshin úlken kómek. Qazir mende 10 bıe bar. Qarajat bolsa, men taǵy da jylqy satyp alar edim. Biraq bárinen buryn maǵan jaıylymdyq jer jetispeıdi. Men mal sharýashylyǵy baǵytynda odan ári jumysymdy keńeıtýge tyrysamyn. Bul maǵan óte unaıdy. Ata-anama rahmet. Olar meni qoldaıdy jáne kómektesedi», – deıdi Almaz aq júreginen aqtaryla.
Tańǵyshbaevtar otbasynyń sút ónimderin negizinen jergilikti turǵyndar tutynady. Qymyz ben saýmaldyń bir bóligin Qaraǵandyda ótkizedi. Turaqty satyp alýshylar da bar.
«Jańa saýylǵan bıe sútiniń densaýlyqqa paıdaly ekenin bári biledi. Immýnıtetti jaqsartady, aýyr derttermen kúresýge kómektesedi. Balalarǵa da, qarttarǵa da jaraıdy. Biz ózimiz de ishemiz», – deıdi kásipker.
Kúndelikti aýyr eńbekke qaramastan, Almaz súıikti isin tastamaıdy. Ol keleshekte qaladaǵy dúkenderdiń birinde óz ónimin satatyn bólimshe ashyp, saýmaldyń paıdasyn basqa da adamdar kórgenin qalaıdy.
