Qaraǵandylyq jas dombyrashylar Chehııadan bas júldemen oraldy
QARAǴANDY. QazAqparat - Qaraǵandy oblysy Saran qalasynyń Balalar óner mektebiniń oqýshylary Chehııada ótken «Prajskıe shedevry» halyqaralyq kóp janrly baıqaýdyń jeńimpazy atandy, dep habarlaıdy QazAqparat tilshisi.
Chehııada ótken baıqaýǵa birneshe eldiń ókilderi qatysty. Dúbirli dodada Saran qalasynyń Balalar óner mektebiniń qazaq halyq aspaptar bóliminiń «Úmit» dombyrashylar ansambli Gran-prıdi ılendi. Jas shyǵarmashylyq ujym qazaq halqynyń «Kelinshek» kúıi men Súgirdiń «Bes jorǵa» shyǵarmasyn oryndady.
«Úmit» dombyrashylar ansambliniń quramynda 9-12 jas aralyǵyndaǵy segiz qatysýshy bar. Bul jeńis ansambldiń barlyq qatysýshylarynyń qajyrly eńbeginiń nátıjesi», - deıdi Saran qalasynyń Balalar óner mektebi dırektory tárbıe jumysy jónindegi orynbasary Svetlana Salova.
