Qaraǵandylyq jas dombyrashy Grýzııada ótken Halyqaralyq baıqaýda bas júldeni jeńip aldy

NUR-SULTAN. QazAqparat – 14 jasar qaraǵandylyq Aıbek Qasymhanov Grýzııada ótken halyqaralyq mýzykalyq baıqaýda bas júldeni jeńip aldy. Ol dombyramen alty jasynan bastap aınalysady, dep habarlaıdy oblystyq ákimdiktiń baspasóz qyzmeti.

– Men Qaraǵandy mamandandyrylǵan mýzyka mektep-ınternatynda dombyramen án aıtý synybynda oqımyn. Meniń jetekshim – Azamat Túsipbekov. Kóptegen oblystyq, respýblıkalyq jáne halyqaralyq baıqaýlar men festıvaldarǵa, sondaı-aq «Qazaqstan daýysy» jobasyna qatysyp, júldeli oryndarǵa ıe boldym, – deıdi Aıbek Qasymhanov.

Grýzııadaǵy halyqaralyq baıqaýǵa jas mýzykant Túrkııadaǵy jeńisten keıin joldaý alǵan.

– Ótken jyly men Almatyda ótken halyqaralyq baıqaýǵa qatysyp, onda birinshi oryn aldym, maǵan Túrkııaǵa joldama berildi. Men onda da birinshi bolyp, Grýzııada ótetin halyqaralyq mýzykalyq baıqaýǵa qatysýǵa shaqyrtý aldym. Shilde aıynyń sońynda ol jerge baryp, sáttilik serigim boldy: men Gran-prı jeńip aldym. Kelesi jyly men taǵy da Grýzııadaǵy mýzykalyq jarysqa qatysýdy josparlap otyrmyn, óıtkeni men sertıfıkat jeńip aldym. Bolashaqta óz ómirimdi mýzykamen baılanystyrǵym keledi. Dombyra men dástúrli halyq ánderin dáripteımin. Mektepti bitirgennen keıin Almatydaǵy Qazaq ulttyq óner akademııasyna oqýǵa túsý josparda bar, – dep bólisti dombyrashy.

Aıbek Qasymhanov negizinen halyq ánderin oryndaıdy. Túrkııa men Grýzııadaǵy baıqaýlarda ol «Bastaý» men «Háláýlimdi» týyndylaryn shyrqady.

Aıbek Qasymhanovtyń esimi «Qazaqstannyń altyn balalary» kitabyna endi.