Qaraǵandylyq zeınetker tórt jyl boıy úıinen shyqpaǵan

2013 jyly zeınetker Aleftına Sherbakovany aralasyp júrgen  kórshisi kútpek bolyp qamqorshylyqqa alý qujatyn rásimdetip alǵan. Osydan keıin kórshisi  jalǵyzbasty qarııanyń zeınetaqysyn alyp otyrǵan, ári ony dalaǵa shyǵarmaı syrtynan kilttep ketetin bolǵan. Qarııanyń denesiniń bir jaq bóligi sal bolyp qalǵandyqtan qybyrlap úı ishinde ázer júredi. Tórt jyl boıy óz úıinde qamaýda bolǵan qarııa ózine kórshisi tarapynan qysym jasalǵanyn aıtady.

«Nege zeınetaqymdy úıge ákelip bermeıdi dep barlyǵynan surap shyqtym. Eshkim eshteńe bilmeıdi, aıtpaıdy. Al myna alaıaqtar meniń aqshamdy alyp otyrypty. Keıin bir joly kelgende zeınetaqymdy surap edim, ol maǵan qatty aıǵaılap, aıtpaǵan sózi qalmady. Sosyn qatty qorqyp qaıtyp suramaıtyn boldym. Ol maǵan myna jerge ishetin sý qoıyp ketedi, sosyn kúnde sýǵa pisken botqa ákelip beredi», - deıdi tyl ardageri Aleftına Sherbakova.

Zeınetkerdiń aıtýynsha bul baspanaǵa kórshisi ózge kórshilerin «meniń páterim» dep jolatpaı qoıypty. Tek osy jyldyń qańtar aıynda qarııanyń múshkil hálin kórip júrgen kórshileri shý shyǵaryp, arasha túsken.

2013 jyldan beri zeınetkerdiń úıine áleýmettik kómek kórsetetin mamandar da bas suqpaǵan.

«Kórshisi kómektesetin bolǵan soń bul qarııa bizdiń kómekti alýdan bas tartqan. Eger  qarııany bireý kútip qaraıtyn bolsa, bizdiń munda kelýge qaqymyz joq. 25 jyl osy salada júrmin mundaı úlken kisige qysym kórsetken jaǵdaıdy birinshi ret kórip otyrmyn», - deıdi Aqtas kentiniń úıde áleýmettik kómek kórsetý bóliminiń mamany Lıýdmıla Lýkovets.

Búginde keıýanaǵa arasha túsken ózge kórshiler advokattyń kómegi arqyly sotqa júgingen. Jalǵyzbasty qarııa sottan páterdi syıǵa tartý boıynsha jasalǵan qujattyń kúshin joıýdy jáne tórt jyl boıy qolyna tımegen zeınetaqyny kórshisiniń keri qaıtarýyn  talap etip otyr.

Zeınetkerdiń sózinshe, kórshisi 2013 jyldan 2018 jyldyń qańtaryna deıin 2 mln 500 myń teńge zeınetaqysyn qaltasyna basqan.

Búginde sot protsessi jalǵasýda.

Araılym SATYBALDYQYZY