Qaraǵandylyq volonterler «Aıaz ata bol!» aktsııasyn bastady
Bul jyl barlyǵy úshin qıyn boldy, sondyqtan volonterler jańa jyl shyn máninde sıqyrly merekege aınalǵanyn qalaıdy.
«Ata-analardyń materıaldyq jaǵdaıyna qaramastan, balalardyń armandary oryndalýy kerek. Sondyqtan biz jyl saıyn balalardy táttilermen jáne syılyqtarmen qýantamyz», - deıdi «Darı dobro!» eriktiler qozǵalysynyń jetkshisi Vıktorııa Polıakova.
Bul top 2015 jyldan bastap jumys isteıdi. Osy ýaqyt ishinde eriktiler qaraǵandylyqtarǵa ǵana emes, ózgelerge de birneshe ret kómekke keldi. Olar Qazaqstannyń barlyq muqtaj turǵyndaryna kómek qolyn sozdy. Qozǵalys quramynda qıyn jaǵdaıda qoldaý kórsetýge daıyn 26 adam bar.
«Biz kóptegen adamǵa kómektestik. Alǵashqy jyldary balalardy mektepke jınap, keńse zattaryn satyp aldyq. Ekinshi qabattan qulap, óz ómiri úshin uzaq ýaqyt kúresken óskemendik kishkentaı balaǵa kómektestik. Qazir bala 6 jasta, 1-shi synypqa barady. Búginde ol jadyrańqy jáne ómirden lázzat alatyn kóńildi bala. Birneshe ret órt sóndirýshilerge qol ushymyzdy sozdyq. Jıyndardy uıymdastyryp, qurylys materıaldaryn, turmystyq tehnıkany jáne taǵy basqasyn ákeldik», - deıdi Vıktorııa Polıakova.
Ótken jyly az qamtylǵan jáne kópbalaly otbasylardan shyqqan kóptegen balanyń jańajyldyq tilekterin júzege asyrý múmkin boldy. Múgedek balalarǵa telefondar men planshetter satyp alyndy. Erteńgilik uıymdastyrylyp, merekelik dastarhan jaıyldy. Birde-bir bala syılyqsyz qalǵan joq.
«Bizdiń bir demeýshimiz keıbir otbaslaryn óz qamqorlyǵyna aldy. Ol úshinshi jyl qatarynan aıyna bir ret azyq-túlik sebetin alyp keledi. Bizde burynnan olardyń qalaı ómir súretinin biletin otbasylardyń tizimi bar. Ótken jyly anımator shaqyryp, úlken shyrsha satyp aldyq. Ókinishke oraı, búgingi jaǵdaıda bul múmkin emes. Biraq biz Aıaz ataǵa barlyq ótinishterdi mindetti túrde joldap, ony oryndaımyz», - deıdi Vıktorııa Polıakova.
Al balalardyń armany ádette qarapaıym. Uldar Jańa jylǵa mashınalar men qurastyrǵyshtar, al qyzdar LoL qýyrshaqtaryn qalaıdy. Búginde Vıktorııa Polıakovada baldyrǵandardan kelgen 100 konvert bar.
«Balalardy kóbirek qamtýǵa bolar edi. Biraq qazir – qıyn kezeń, sondyqtan biz negizinen óz kúshimizge senýimiz kerek. Ár bala ǵajaıypqa úmittenedi, biz ol úmitti jerge tastamaýǵa tyrysamyz. Jáne de biz kez-kelgen kómekke qýanyshtymyz», - deıdi Vıktorııa.
Kez kelgen nıet bildirýshi «Aıaz ata bol!» qaıyrymdylyq jobasyna qatysa alady. Eń bastysy - balanyń armanyn oryndaýǵa nıeti bolýy tıis. Aıaz atanyń jańa jyldyq sómkesine oıynshyqtar, bilim berý oıyndary, shyǵarmashylyq jıyntyqtar, kitaptar jáne taǵy basqalar qabyldanady. Naýqan týraly tolyq aqparatty +7-707-137-27-75 telefony arqyly alýǵa bolady.
