Qaraǵandylyq vokzal kúrdeli jóndeýden soń qandaı bolady
QARAǴANDY. QazAqparat - Qaraǵandy temirjol vokzaly qaıta jańartylyp, jolaýshylar úshin anaǵurlym yńǵaıly jáne qaýipsiz bolady dep kútilýde, dep habarlaıdy QazAqparat tilshisi.
Basty ózgeris vokzaldyń aýmaǵyna qatysty bolmaq. Ǵımaratty keńeıtý úshin onyń janynan qosymsha nysany salynyp jatyr. Vokzaldyń úsh qabatty jańa qanatynda kassalar, kútý zaldary, medpýnkt, múmkindigi shekteýli adamdarǵa arnalǵan demalys bólmesi, ana men bala bólmesi, fýdkorttar men saýda dúńgirshekteri ornalasady.
Jolaýshylar perronǵa jerústi ótkelderi arqyly kire alady. Perrondar shatyrmen jabylady. Konkorsty ótkel vokzal ǵımaratynan ekinshi, úshinshi, tórtinshi jáne besinshi jolǵa ótetin bolady. Ony jylytý júıesimen jáne zamanaýı eskalatorlarmen jabdyqtaıdy.
Jańartylǵan vokzal múmkindigi shekteýli adamdarǵa da yńǵaıly jáne qoljetimdi bolady. Ǵımaratta tabaldyryqtar bolmaıdy, keńeıtilgen lıftiler men jeke dárethanalar qarastyrylǵan. Jer ústi ótkelderinde arnaıy lıft ornatylady.
Qalypqa keltirý boıynsha aýqymdy jumystar vokzaldyń dástúrli sáýlet stılin ózgertpeıdi. Ony aqshyl taspen qaptap, baǵanalar men sándik elementter ornatylady. Ǵımarattyń ishin bezendirip turǵan barelefter qalpyna keltirilip, qaıtadan ornatylady.
Qaıta jóndeýden keıin vokzal táýligine 8 000 jolaýshyny qabyldaı alady. Bir mezgilde onda 2 300 adamǵa deıin ornalasa alady. Kútý zalyndaǵy oryn sany 250-den 670-ke deıin artady.
Qaraǵandyda temirjol vokzalynyń ǵımaraty 1956 jyly salynǵan. Onyń jalpy aýdany 2 796.8 sharshy metrdi quraıdy. Táýligine vokzalǵa shamamen 2 000 adam barady. Sońǵy ret ǵımarat 2008 jyly kúrdeli jóndeýden ótken.
Aýqymdy qalypqa keltirý 2018 jyldyń tamyz aıynda bastaldy. Jóndeý jumystary 2019 jyldyń jeltoqsan aıynyń sońyna deıin aıaqtalady dep josparlanyp otyr.
