Qaraǵandylyq velomarafonshy Qazaqstannyń rekordtar kitabyna endi
QARAǴANDY. QazAqparat – Nur-Sultanda aǵartýshy, lıngvıst-ǵalym, aýdarmashy, túrkitanýshy jáne «Alash» partııasynyń múshesi Ahmet Baıtursynovtyń 150 jyldyǵyna arnalǵan jeke velomarafon ótti. Velosherýdiń bastamashysy ári qatysýshysy qaraǵandylyq Ernat Melsuly 9 saǵat 56 mınýt ishinde 150 shaqyrymdy baǵyndyryp, el rekordyn ornatty, dep habarlaıdy QazAqparat tilshisi.
«Ótken jyly Ybyraı Altynsarınniń 180 jyldyǵy men Táýelsizdiktiń 30 jyldyǵyna oraı Astanadan Qostanaıǵa «Ybyraıdyń izimen» atty velojarys
uıymdastyrdym. Menen basqa oǵan taǵy tórt adam qatysty. Sol kezde men Ahmet Baıtursynovtyń 150 jyldyǵyna oraı velomarafon uıymdastyrýǵa bel býdym.
2015 jyldan bastap men únemi velosıpedpen júremin – jumystan úıge jáne úıden jumysqa. Jyl basynda ózimdi qysqy velosherýde synap kórdim. Ol úshin men trıatlon parkin tańdadym, onda arnaıy velosıped joly bar. Bir sheńber – úsh shaqyrym. Meniń rekordym – 9 saǵat 56 mınýtta 150 km», – deıdi Ernat.
Velosherý Qazaqstannyń rekordtar kitabyna alǵashqy qysqy velomarafon retinde endi. Jetistikti basylymnyń resmı ókili Qýandyq Qudaıbergenov jazdy.
Marafonshy óziniń rekordymen Ahmet Baıtursynovtyń mereıtoıyna úles qosqysy keldi.
«Men Abaı, Shákárim, Ahmet, Álıhandy oqımyn. Meniń zertteýlerim ádebı emes, motıvatsııalyq. Olardyń shyǵarmashylyǵy men ómiri árkimdi myqty adam jáne patrıot bolýǵa shaqyrady. Bıylǵy jylǵy eń úlken armanym — halyqaralyq deńgeıge shyǵý. Shetelge barǵym keledi, ıaǵnı halyqaralyq velojarys ótkizip, ony Ahmet Baıtursynovtyń mereıtoıyna arnaǵym keledi. Óz jolymdy aǵartýshy týǵan Aqkól aýylynan bastap, Parıjge deıin jetkizýdi josparlap otyrmyn. Ýaqyt áli belgisiz, qazir marshrýt jasaý ústinde jumys istep jatyrmyn. Aldyn ala esepteýler boıynsha men 13 elden ótýim kerek», – deıdi Ernat.
