Qaraǵandylyq velomarafonshy 55 kúnde 5555 shaqyrym júrip ótti
Marafon Ahmet Baıtursynulynyń týǵan kúninde, 5 qyrkúıekte, mereıtoı ıesiniń týǵan jeri - Aqkól aýylynda bastalyp, Ystambulda aıaqtaldy.
«Mende eki mindetti shart boldy: birinshisi – 5-shi qyrkúıekte, Ahmet Baıtursynulynyń týǵan kúninde marafonymdy bastaý, ekinshisi – Ult ustazynyń týǵan aýylynan jolǵa shyǵý. Meniń saparymnyń 60%- y, 3000 shaqyrymnan astamy Qazaqstannyń tórt óńiri – Qostanaı, Aqtóbe, Atyraý jáne Mańǵystaý oblystary boıynsha ótti. Sodan keıin men Kýtaısıge (Grýzııa) ushtym. Men Qara teńiz boıymen 600 km júrdim. jáne Túrkııa shekarasyn kesip ótip, Erdoǵannyń týǵan qalasy Rızaǵa jettim», - deıdi Ernat Melsuly.
Túrkııada velomarafonshy Trabzon, Ordý, Samsýn, Chorým, Kale, Ankara qalalarynda bolyp, ony Qazaqstan elshiligi, Býrsa jáne Ystambul qarsy aldy.
«Men is júzinde 5585 km júrdim. Biraq este qalý úshin jáne ádemi san bolýy úshin ózim josparlaǵandaı, 55 kún ishinde 5555 km óttim dep qaldyrdym. Men velotýrymdy taekvondodan jeti dúrkin álem chempıony Alashtyń uly Mustafa Óztúrik zıratynda aıaqtadym. Kórnekti sportshynyń úıin kórdim, qazir onyń oqýshysy Djemal Kabadaıı basqaryp júrgen ataqty tulǵanyń ózi qurǵan mektepke bardym. Mustafa Óztúriktiń urpaqtary maǵan kýbok pen medal syılady», - deıdi velomarafonshy.
Velosıpedpen Ernat jyl boıy, 12 aı júredi jáne halyqaralyq marafondy aıaqtaǵan bette jańa marshrýttar josparlap otyr.
«Meniń maqsatym – búkil álemdi temir tulparymmen aınalyp ótý. Strategııa – marshrýttardy qaıtalamaý. Endi men Shyǵysqa barǵym keledi. Kelesi jyly Sultan Beıbarysqa 800 jyl tolady, velosherýimdi soǵan arnaýdy josparlap otyrmyn. Men Aqtoǵaıda bastaımyn jáne Egıpette, Kaırde aıaqtaımyn. Munda ol 17 jyl bılik etken. 2024 jyly Stambýldan Parıjge jetýdi kózdep otyrmyn. Onda jazǵy Olımpıada oıyndary ótedi, al ekinshi sebep – Mustafa Óztúriktiń 70 jyldyǵy bolady. Ol birinshi bolyp Germanııada, Túrkııada jáne Qazaqstanda taekvondony tanymal ete bastady», - deıdi Ernat.
Esterińizge sala keteıik, osy jyldyń aqpan aıynda Ernat Melsuly 9 saǵat 56 mınýtta 150 shaqyrymdy júrip ótti. Velosherý Qazaqstannyń rekordtar kitabyna alǵashqy qysqy velomarafon retinde endi.
