Qaraǵandylyq úzdik muǵalimderge 1 mln-nan astam teńge syıaqy tólenedi
QARAǴANDY. QazAqparat -Bıyl Qaraǵandy oblysynyń muǵalimderi alǵash ret kásibı merekege oraı qurmet tós belgileri men iri aqshalaı syıaqy alady. Bul týraly óńir basshysy Jeńis Qasymbek onlaın rejımde ótken tamyz otyrysynda málim etti, dep habarlaıdy QazAqparat óńir basshysynyń resmı saıtyna silteme jasap.
- Bıylǵy jyly oblysymyzdaǵy muǵalim mamandyǵynyń bedelin kóterý úshin «Qaraǵandy oblysynyń bilim berý salasynyń qurmetti pedagogi» tós belgisi jarııalandy. Bul marapat úzdik pedagogtarǵa tapsyrylady. Onyń ıegerlerine 400 AEK mólsherinde aqshalaı syıaqy tólenedi – bul bir mıllıonnan astam teńge. Bul marapattyń birinshi ıegerlerin sizderdiń kásibı merekelerińiz – Muǵalimder kúnine oraı anyqtaımyz, - dedi oblys ákimi.
Jeńis Qasymbek memleket pen jergilikti atqarýshy bıliktiń bilim berý júıesine erekshe nazar bólip otyrǵandyǵyn atap ótti. Osy jyldyń 1 qańtarynan bastap pedagogtardyń jalaqysy orta eseppen 25%-ǵa ósti. 70-ten 100 AEK deıin «Dıplommen aýylǵa!» baǵdarlamasy sheńberinde jas mamandarǵa kóterme jalaqy ulǵaıdy. Stýdenterdiń shákirtaqysy 25%-ǵa ulǵaıtyldy.
Óńir basshysy bilim berý salasynyń ınfraqurylymyn damytý týraly baıandady. Bul jyly mektepterdi, balalar baqshasy men kolledjderdi jóndeýge 16,8 mlrd teńge bólindi, bul 2019 jylmen salystyrǵanda shamamen úsh ese artyq. Oblys qalalarynda zamanaýı standarttar boıynsha jabdyqtalǵan mektep oqýshylarynyń eki jańa saraıy ashylady.
Koronavırýs indetine baılanysty qashyqtan oqytýǵa shuǵyl ótýge týra keldi, pedagogtar qoldaýsyz qalǵan joq.
Jańa oqý jylynyń qarsańynda oblystyń 160 pedagog vedomstvolyq marapatqa ıe boldy jáne 10 bilim qyzmetkeri oblys ákiminiń alǵys hatyn aldy.
Osy jyly bilim berý qyzmetkerleriniń dástúrli tamyz konferentsııasy búgin, 26 tamyzda Zoom platformasynda jáne Facebook áleýmettik jelisinde onlaın ótti. Oǵan on myńnan astam adam: bilim qyzmetkerleri, ata-analar qoǵam jáne úkimettik emes uıymdardyń ókilderi qashyqtan qatysty. Kezdesý Saryarqa telearnasynyń tikeleı efırinde jáne YouTube-ta kórsetildi.
Konferentsııa jańa oqý jylynyń erekshelikterine arnaldy. Qatysýshylar qashyqtyq formatynda oqytýdy uıymdastyrý jáne bilim sapasyn arttyrý máselelerin talqylady. Qalalyq jáne aýyldyq mektep oqýshylaryna arnalǵan jańa bilim jobalary usynyldy.
