Qaraǵandylyq ulttyq-mádenı ortalyqtar Tilder kúnin atap ótti

QARAǴANDY. QazAqparat - Qaraǵandy qalasyndaǵy Dostyq úıinde Tilder kúnine arnalǵan «Til tatýlyq tiregi» atty festıval ótti, dep habarlaıdy QazAqparat óńir basshysynyń resmı saıtyna silteme jasap.

Etnomádenı birlestikterdiń qatysýymen ótken shara «Rýhanı jańǵyrý» baǵdarlamasynyń aıasynda uıymdastyryldy. Túrli ult ókilderinen quralǵan balalar men eresekter memlekettik tildi qanshalyqty jaqsy meńgergenderin kórsetti.
Bul rette ásirese koreı jáne nemis ortalyqtarynyń kishkentaı qatysýshylary erekshelendi. «Qazaqtaı el qaıda» ánin oryndaǵan Tımýr Tenge kórermender qaýymy dý qol shapalaqtap, ónerine tánti boldy. Al «Ridne slovo» ýkraındyq ortalyǵynyń múshesi Oksana Mendelıýk sahnaǵa shyǵyp, «Kózimniń qarasy» ánin oryndady. «Ahyska» túrik ortalyǵynyń ókili Zarına Safarova Buqar jyraý Qalqamanulynyń «Bıik taýǵa jarasar» atty óleńin oqyp berdi. Sondaı-aq uly jazýshymyz Abaıdyń óleńderin túrli etnostardyń ókilderi mánerlep oryndady.
- Bizdiń kúshimiz - birligimizde. Árbir azamat óz memleketiniń patrıoty bolyp, memlekettik tildi bilýi tıis. El Prezıdenti Qasym-Jomart Toqaev óziniń halyqqa Joldaýynda el birligi onyń san alýandyǵynda ekenin, jáne de til úlken saıasattyń quraly bolyp tabylatynyn este saqtaý kerek ekenimizdi atap ótti, - deıdi Qaraǵandy oblysy QHA Jastar úılestirý keńesiniń jáne «Polonııa» mádenıet ortalyǵynyń múshesi Vıktorııa Sosnovskaıa.
Etnomádenı birlestikter sonymen qatar ulttyq buıymdar kórmesin uıymdastyrdy.
Festıval barysynda «Tilge qurmet-Elge qurmet» ınternet-aktsııasyna jáne #Abaı175 ádebı chellendjine qatysýshylar marapattaldy.