Qaraǵandylyq ýltramarafonshy Zańǵar Álkenov 320 shaqyrymdy baǵyndyrmaq
QARAǴANDY. QazAqparat – Qaraǵandy garnızonynyń áskerı polıtsııa bóliminiń ofıtseri Zańǵar Álkenov ýltramarafonǵa daıyndalýda. Ol óziniń júgirýin armııa úshin erekshe kún - 7 mamyrda bastaýdy josparlap otyr. Al ázirshe Almatydaǵy Alataý baýraıynda qarqyndy jattyǵýlar ótýde, dep habarlaıdy QazAqparat tilshisi.
2020 jyly Zańǵar Qaraǵandy - Atasý baǵyty boıynsha 200 shaqyrymdy sátti eńsergen bolatyn.
«Qazir ýltramarafonnyń ekinshi kezeńi - 320 shaqyrym. Almatyda mamandar naqty jospar quryp, aǵza úshin qajetti sý mólsherin esepteıdi», - deıdi Zańǵar Álkenov.
Ýltramarafonshynyń kóptegen jetistikteri bar. Ol qazaq kúresinen sport sheberi, dzıýdodan sport sheberine úmitker. 2012 jyly jaraqat alǵannan keıin jekpe-jek ónerin uzaq qashyqtyqqa júgirýge almastyrdy.
320 shaqyrymdyq júgiristi GPS-navıgator arqyly onlaın rejıminde baqylaýǵa bolady.
«Bári jaqsy deńgeıde ótedi dep oılaımyn. Eger bul marafon men úshin tabysty bolsa, kelesi jyly Qaraǵandy - Almaty baǵyty boıynsha 1 000 shaqyrym júgirýdi josparlap otyrmyn», - deıdi Zańǵar Álkenov.
