Qaraǵandylyq ýchaskelik ınspektorlar óz «qamqorlyǵyndaǵy» maskúnemderge kómektesýde
QARAǴANDY. QazAqparat - Qaraǵandyda burynǵy maskúnemder ishimdikti tastap, túzý jolǵa túsýine jáne narkologııalyq dıspanserden tirkeýden shyǵýyna septigin tıgizgen ýchaskelik polıtseılerge alǵys bildirdi, dep habarlaıdy QazAqparat tilshisi.
«Men osyǵan deıin qandaı qatelikter jasaǵanymdy túsindim. Ómirimnen sabaq aldym. Aldaǵy ýaqytta basqasha ómir súrgim keledi. Oǵan bizdiń ýchaskelik polıtseı kómektesti», - deıdi Azamat esimdi qaraǵandylyq turǵyn.
Ol kóp jyldar boıy ishimdikke salynyp, otbasynyń berekesin qashyrǵan. Anasynyń kóz jasyna da esh mán bermeı kelgen. Nátıjesinde Azamat úshin osyndaı «kóńildi» keshter birdeı aıaqtalatyn. Qart áıeldiń shaqyrýy boıynsha buzaqyny tynyshtandyrýǵa ýchaskelik polıtsııa qyzmetkeri keledi. Sodan keıin ony arnaıy mekemege qamap, ishimdikten májbúrlep emdeıdi.
«Ne isteıin endi? Ol meniń kenje ulym. Qandaı bolsa da shydaımyn. Kóp ýaqyt boıy túzý jolǵa túsýin ótindim. Biraq esh nátıjesiz. Polıtseılerge rahmet. Árqashan meniń shaqyrýyma birden jaýap beretin», - deıdi Azamattyń anasy.
Degenmen, ýchaskelik ınspektor Kárim Qalıev Azamatpen ishimdikke salynýdy toqtatý týraly áńgimelerin toqtatpaǵan. Ol jumystar nátıjesin bergen. Al jýyrda er adam narkodıspanserdegi tirkeýden shyqqan.
Jergilikti ýchaskelik polıtseıdiń «qamqorlyǵyndaǵy» taǵy bir turǵyn - Natalıanyń ishimdik ishpegenine bes jyl boldy. Ol ótken kúnderin túrshige eske alady.
«Men ózimniń bolashaǵyma balta shaba jazdadym. Otbasymnan aıyrylýǵa bir qadam jaqyn qaldym. Ýchaskelik ınspektordyń arqasynda qazirgi tańda tolyqqandy ómir súrip jatyrmyn. Bolashaqqa josparlarym kóp», - deıdi Natalıa.
Polıtsııa ınspektorlarynyń aıtýynsha, kóptegen turǵyndar ishimdik ishken týystary týraly málimdemeıdi. Negizinen olardyń naqty sany reıdter kezinde anyqtalady. Jańa Maıqudyq Polıtsııa bóliminde №26 ÓPP ınspektorlary ótkizgen osyndaı is-sharalardyń birinde biz de boldyq. Aıta ketý kerek, reıd kezinde tek aýmaqta quqyqbuzýshylyq anyqtalyp qana qoımaı, sonymen qatar ınspektorlardyń jumysy da baǵalanady.
«Qazir bizde negizinen ákimshilik quqyqbuzýshylyqtar tirkeledi. Usaq buzaqylyq, belgilenbegen jerde qoqys tastaý sııaqty. Degenmen, bul tártip buzýshylyqtardyń da sany azaıyp keledi. Buǵan arnaıy jasaqtyń aýmaqty sholýy jáne «kórshilerdiń baqylaýy» jobasyn iske qosý yqpal etýde. Sondaı-aq aýlalarda ornatylǵan Jedel baqylaý ortalyǵynyń baqylaý kameralary óte kómektesedi. Tek bizdiń ýchaskede olardyń sany 30-ǵa jýyq. Al bizdiń ýchaskeniń maskúnemderi jáne nashaqor azamattaryna toqtalar bolsaq, jyl saıyn narkodıspanserde esepte turǵandardyń sany azaıýda. Sońǵy 10 jylda olardyń sany 4 esege qysqardy», - deıdi Jańa Maıqudyq PB ýchaskelik polıtsııa ınspektory Kárim Qalıev.
2018 jyly Qaraǵandy qalasy boıynsha 1772 adam narkodıspanserde esepte turdy. Bul 2017 jyldyń sáıkes kezeńimen salystyrǵanda 10% tómen. Buǵan qosa, májbúrlep emdeý qorytyndysy boıynsha da jaqsy úrdis baıqalady. Mundaı emdeýden keıin 10-nan astam adam alkogoldi ishimdikterdi ishýdi toqtatty.
