Qaraǵandylyq túlekti sheteldiń jeti joǵary oqý orny shaqyrdy

QARAǴANDY. QazAqparat – Qaraǵandy NIS túlegi (Nazarbaev zııatkerlik mektebi) Adıhan Túıshıev jeti sheteldik joǵary oqý ornynan shaqyrtý aldy. Jas jigit óz ómirin IT-tehnologııalarmen baılanystyrmaq, dep habarlaıdy QazAqparat tilshisi.

Adıhan Túıshıev 18 jasta. Bıyl ol NIS-ti bitirip, birden birneshe sheteldik ýnıversıtetterge emtıhan tapsyrǵan.

«Maǵan Amerıkadan, Sıngapýrdan, Vengrııadan, Germanııadan jáne basqa elderden shaqyrtý jiberildi. Men Germanııadaǵy Jacobs University Bremen-di tańdadym, óıtkeni ol maǵan tolyq grant berdi. Bul halyqaralyq oqý orny, onda búkil álemniń stýdentteri oqıdy. Olar aǵylshyn tilinde sabaq beredi», – deıdi Adıhan.

Bolashaq stýdent naqty ǵylymdarda da, IT-baǵytta da jetik. Ol kóptegen oblystyq jáne respýblıkalyq olımpıadalardyń, konkýrstardyń júldegeri. Sondaı-aq, Adıhan sportpen shuǵyldanady jáne kóp oqıdy. Oǵan UBT-da 140 baldan 137 ball jınaýǵa tabıǵı qyzyǵýshylyq pen qajyrly eńbegi kómekteskenin aıtady.

Ol mektepti «Altyn belgige» bitirgen.

«Maǵan bilim bergen ustazdaryma rızamyn. Olar maǵan kóp nárseni úıretti, boıymdaǵy qasıetterimdi ashty. Men daryndy balalar úshin barlyq jaǵdaı jasalǵan NIS-te oqyǵanyma qýanyshtymyn. Bizdiń mektepte oqýshylardy shabyttandyratyn jáne yntalandyratyn erekshe energetıka bar», – dedi túlek.

Germanııada joǵary bilim alǵannan keıin Adıhan Qazaqstanda jumys isteýdi josparlap otyr.