Qaraǵandylyq túlekti AQSh-tyń tórt birdeı oqý orny bilim alýǵa shaqyrdy
QARAǴANDY. QazAqparat – Qaraǵandylyq Balnur Túlenovany bir mezgilde AQSh-tyń tórt ýnıversıteti oqýǵa shaqyryp otyr. Ol halyqaralyq emtıhan tapsyryp, nátıjesin álemniń birneshe ýnıversıtetiniń jalpy bazasyna jibergen, dep habarlaıdy QazAqparat tilshisi.
Balnur Túlenova Qaraǵandy qalasynyń Nyǵmet Nurmaqov atyndaǵy daryndy balalarǵa arnalǵan mamandandyrylǵan mektep-ınternatyn bitirgen.
«Meniń tulǵa retinde qalyptasýym otbasymda bastaldy. Ata-anam maǵan syn-qaterdi qabyldap, qorqynysh jáne kemshiliktermen kúresý úshin qolymnan kelgenniń barlyǵyn jasaý kerek dep tárbıeledi. Bala kezimnen bastap anam men ákem maǵan árdaıym básekege daıyn, birinshi kezekte ózimmen kúresýdi, árqashan joǵary deńgeıge shyǵýdy úıretti. Al ómirlik jaǵdaılar ata-anamnyń maǵan úıretken daǵdylaryn damytýǵa, jeke basymnyń qalyptasýyna jáne kim bolǵym keletinin túsinýge múmkindik bergen serpin boldy», - deıdi Balnur.
Boıjetken orys, qazaq, frantsýz, aǵylshyn jáne túrik tilderin meńgergen. Ony ekonomıka, áleýmettaný jáne jaratylystaný ǵylymdary qyzyqtyrady.
«Sheteldik ýnıversıtetter bolashaq stýdentterdiń ózindik damýyna, motıvatsııasyna, ishki sıpaty men dúnıetanymyna úlken mán beredi. Meniń motıvatsııalyq hatymdy oqyp, olar tań qaldy. Bes tildi bilýden basqa, men filmmaking and photography-men, sondaı-aq ekologııalyq jobalarmen aınalysamyn, matematıka boıynsha olımpıadalarǵa qatystym. Aınalysatyn jáne oqıtyn dáristerimniń tizimi aýqymdy. Ýnıversıtetter tulǵa retinde qalyptasyp kele jatqan jastardy izdeıdi. Boıymda armandarymdy júzege asyrý úshin jetkilikti kúsh, bilim jáne múmkindikter bolsa deımin. Bolashaqta óz bıznes-jobalarymdy júzege asyrǵym keledi», - dedi Balnur Túlenova.
10-synypta ol halyqaralyq emtıhan tapsyryp, nátıjesin ýnıversıtetterdiń jalpy bazasyna jibergen. Kóp kútpesten oǵan oqýǵa shaqyrý keldi.
Balnur Rod-Aılend shtatynyń ýnıversıtetine toqtaldy. Bul oqý ordasynda bilim alý quny - jylyna 80 myń AQSh dollaryna deıin. Sátti tapsyrylǵan emtıhan qaraǵandylyq túlekke tegin oqýǵa múmkindik beredi.
Bilim alyp, Balnur halyqaralyq kompanııalarda jumys tájirıbesin jınaqtaýdy josparlap otyr. Sodan keıin óz isin ashyp, el ekonomıkasyn qoldaý úshin Qazaqstanǵa oralmaq.
