Qaraǵandylyq túlek Azııanyń bedeldi joǵary oqý oryndaryna grant jeńip aldy

QARAǴANDY. QazAqparat - Qaraǵandy qalasyndaǵy Nazarbaev Zııatkerlik mektebiniń túlegi Jánııa Smaǵulova Azııa elderiniń tanymal ýnıversıtetterine tolyq grant aldy, dep habarlaıdy QazAqparat oblys ákimdiginiń resmı saıtyna silteme jasap.

Olardyń arasynda Ońtústik Koreıadaǵy Ýlsan Ulttyq Ǵylym jáne tehnologııa ýnıversıteti (UNIST) jáne Gonkongtyń Qytaı ýnıversıteti bar.

Uzaq oılanǵannan keıin Jánııa Ýlsan Ulttyq Ǵylym jáne tehnologııa ýnıversıtetin tańdady. Ýnıversıtet Ońtústik Koreıanyń ónerkásiptik astanasy – Ýlsan qalasynda ornalasqan.

Oqý orny 2009 jyly qurylǵan, biraq óz zertteýleriniń arqasynda qysqa ýaqyt ishinde álemdik deńgeıdegi ýnıversıtet deńgeıine kóterilgen.

«UNIST - Ońtústik Koreıadaǵy eń úzdik ýnıversıtetterdiń biri. Men úshin olardyń qatarynda bolý úlken qurmet. Ýnıversıtet maǵan jan - jaqty damýǵa jáne kreatıvti jáne talantty stýdenttermen jańa jobalar jasaýǵa múmkindik beredi dep oılaımyn», - deıdi Jánııa.

Ýnıversıtette qaraǵandylyq qyz bala Halyqaralyq ekonomıka men qarjyny zertteımin dep josparlap otyr.

«Bolashaqta men osy sala boıynsha damýdy jalǵastyryp, ekonomıkamyzdyń órkendeýine óz úlesimdi qosqym keledi», - dep atap ótti ol.