Qaraǵandylyq tiginshi 30 jyldan beri qundyz bórik pen sáýkele tigýmen aınalysady
QARAǴANDY. QazAqparat – Qaraǵandy qalasynyń turǵyny Nurjan Asaýbaev qazaq ulttyq bas kıimderin tigýmen aınalysady. Ol basshylyq jasap otyrǵan 25 áıelden quralǵan ujym sándi bórikter, sáýkele, taqııa, tymaq tigedi, dep habarlaıdy QazAqparat.
Qaraǵandylyq Nurjan Asaýbaev 30 jyldan beri tigin tigedi. Bul ónerge ony ájesi men anasy baýlyǵan.
«Qarqaralyda burynǵy Jańa jol, qazirgi Qýmaıa degen aýylda turǵan kezimiz edi. Sol kezde altynshy synypta oqyp júrgenimde teriden alǵash ret bas kıim tiktim. Ájem de, anam da tiginshi bolǵandyqtan qanmen berildi me, bilmeımin, áıteýir osy ónerge áýes boldym», - deıdi sheber.
Mektep bitirgen soń Nurjan Asaýbaev ásker qataryna shaqyrylyp, Otan aldyndaǵy boryshyn ótep kelgen soń aýyldan Qaraǵandyǵa kóshken.
Bastapqyda bir jyl qurylys salasynda jumys istedim, deıdi sheber. Degenmen tigýge degen qushtarlyǵy basym bolyp, sol kezde «Turmys úıi» dep atalǵan tigin tsehyna ornalasqan.
Ol jerde ton tigetin bólimshede jumys istegen. Ol 1986 jyl bolatyn. Tsehqa oqýshy retinde ornalasqan.
Bastapqyda alty aı tájirıbeden ótip, aı saıyn 50 som jalaqy alyp otyrǵan. Sonan soń tseh basshylary ony ton tigetin sheber retinde resmı túrde jumysqa aldy.
Mine, sodan beri osy kúnge deıin tiginmen aınalysyp keledi.
«Kóbine bas kıimder: qundyz bórik, teriden taqııa, bórik, tymaq tigemin. Keıde tapsyrys boıynsha qundyz jaǵaly shapan tigemin. Jumysymnyń basym bóligi - teriden jasalǵan buıymdar. Keıingi 20 jyl boıy «Nur ásem» fırmasynda jumys isteımin. Biraq úıden jumys istegendi unatamyn. Maǵan olar tapsyrys beredi, sosyn sol tapsyrys boıynsha bas kıim tigemin. Kóbine bıshilerdiń topy, sáýkele, taqııasyna typsyrys kóp túsedi», - deıdi tiginshi.
Qazirgi ýaqytta qyz balalardyń uzatý toıyna arnalǵan shekeligi bar, úkili sáýkelege tapsyrys kóp túsedi eken.
Sonymen qatar syılyq, qurmetti qonaq kelip jatsa, solarǵa oıýly, qundyz jaǵaly shapandar men bórikter tigemiz, deıdi Nurjan Asaýbaev.
Onyń qolynan shyqqan shapan men bórikti Ramzan Qadyrovqa, Asanáli Áshimov aǵamyzdyń ıyǵyna japqanyn tiginshi maqtan tutady.
«Bir sáýkeleni tigýge úsh kún ýaqytym ketedi. Jáne bul jerde eń mańyzdysy - tapsyrysty qanshalyqty jyldam tikkenim emes, ol zattyń kisige qanshalyqty unaǵany. Tipti keıde oryndaǵan tapsyrysymnyń baǵasyna da qaramaımyn, alyp jatqan klıentim razy bolsa, eńbegimniń qunyn túsirip te beremin. Sebebi birinshi kezekte men tiginnen lázzat alamyn, ekinshiden tapsyrys berýshilerdiń keremet áser alyp, qýanǵanyn kórip jadyraı túsemin», - deıdi ol.
Qaraǵandylyq sheber bul kásipti erekshe jaqsy kóretinin aıtady. Alaıda jastar arasynda onyń izin basqysy keletinder az ekenine nalıtynyn jasyrmady.
«Bul jumys óte aýyr, shydamdylyqty qajet etedi. Jastar az ýaqyt jumys istep, kóp aqsha tapqysy keledi. Al bizdiń bul jumysymyz ınemen qudyq qazǵandaı. Qanshama ýaqytymyzdy jumsap, bir ónim ǵana jasap shyǵaramyz. Sondyqtan jastar bul ónerge keremet qushtar emes. Degenmen maǵan osylaı tigýdi úıretińizshi dep kim kim kelse de, oǵan ustazdyq etýge daıynmyn», - deıdi Nurjan Asaýbaev.
