Qaraǵandylyq tergeýshi eki balanyń ólimine qatysty is qalaı ashylǵanyn aıtyp berdi
QARAǴANDY. QazAqparat – Jyldyń basynda Qaraǵandy oblysyndaǵy Abaı qalasynyń turǵyndaryn ek jas balanyń ólimi týraly jańalyq dúrliktirgen bolatyn. Balalardyń ólimine olardyń anasy kináli ekeni anyqtaldy. Balalar qandaı jaǵdaıda qaıtys bolǵany jaıly QazAqparat tilshisine tergeýshi baıandap berdi.
2020 jyldyń 29 aqpanda Abaı aýdandyq PB kezekshi bólimine Abaı qalasynyń kópqabatty úılerindegi páterdiń birinde eki bala qaıtys bolǵany týraly habar kelip tústi. Oqıǵa ornyna kelgen jedel tergeý toby isti biryńǵaı tergeý tizilimine tirkedi. Tergeýshiler men jedel ýákilderdiń arasynda aǵa tergeýshi Vasılıı Agafonov ta boldy.
«Oqıǵa bolǵan jerdi zertteý barysynda úıde balalardyń anasy bolǵandyǵy anyqtaldy. Tergeý júrgizilip, sot-medıtsınalyq saraptama taǵaıyndaldy, onda kúdikti ananyń áreketi balalardyń ólimine sebep bolǵany anyqtaldy», - deıdi Vasılıı Agafonov.
Sol kúni qaıtys bolǵan eki balanyń anasy kúndiz sábıin uıyqtatpaq bolǵan. Ol jylap jatqan balalaryn úlken kórpemen tumshalap jaýyp tastaǵan. Áıeldiń aıtýynsha, balalar osylaısha 15-20 mınýt jatqan. Al balalar tynyshtalǵannan keıin, ol kórpeni ashyp, olardy kereýetterge jatqyzyp, ózi de uıyqtaǵan. Oqıǵa kezinde balalardyń anasy mas bolǵany anyqtalǵan, bul saraptama nátıjesinde rastaldy. Ol shamamen 17.00-de oıanǵan. Alaıda ol kezde balalar tynys almaı jatqanyn baıqaǵan.
«Kúdiktiniń kinási barlyq is-shara men saraptamada Qylmystyq kodekstiń 104-baby 2-bóligi ıaǵnı «Abaısyzda eki nemese odan da kóp adamdy qazaǵa ushyratý» boıynsha dáleldendi. Keıin bul is sotqa jiberý úshin prokýratýraǵa joldandy», - dep túsindirdi aǵa tergeýshi.
Áıelge 4 jylǵa shartty merzim berildi. Tergeýshi túsindirgendeı, ol tártibi boıynsha buǵan deıin eshqandaı esepte turmaǵan.
«Bizde bul dálirek aıtar bolsaq, dál osy Abaı aýdany boıynsha, men jumys istegen ýaqyt aalyǵyndaǵy jalǵyz jaǵdaı. Bizdiń tarapymyzdan, sondaı-aq kámeletke tolmaǵandardyń isteri jónindegi ýchaskelik polıtseıler nemese ınspektorlar kóp jumys jasaıdy. Turmysy tómen otbasylar esepke alynady. Olarǵa qatysty birqatar shara qolǵa alynǵan. Sondaı-aq azamattardy turǵylyqty jeri boıynsha tekseremiz. Turǵyndarmen de aldyn alý jumysy júrgiziledi», - deıdi Vasılıı Agafonov.
