Qaraǵandylyq tártip saqshylary 14 jyl jasyrynyp júrgen qylmyskerdi quryqtady
QARAǴANDY - QazAqparat - Qaraǵandylyq polıtseıler kórshiles oblysta qaraqshylyq shabýyl jasaǵany úshin 14 jyl izdeýde júrgen qylmyskerdi ustady, dep habarlady Qaraǵandy oblysynyń ІІD baspasóz qyzmetinen.
«Qaraǵandy qalasy ІІB Kırov polıtsııa bóliminiń krımınaldyq polıtsııa qyzmetkerleri jedel izdestirý sharalary barysynda Aqmola oblysynda 14 jyl jasyrynyp júrgen qylmyskerdi ustady», - delingen habarlamada.
Polıtsııa aqparatynsha, ustalǵan 48 jastaǵy er adam 2000 jyly qaraqshylyq shabýylǵa qatysqan. Qarýlanǵan tonaýshylar qaraǵandylyqtyń úıine basa kóktep kirip, jarty mıllıon teńgege jýyq qarajatty qoldy etken.
«Búginde ustalǵan adam tergeý abaqtysyna qamaldy. Jaqyn arada onyń isi sotqa beriledi», - dep qosty oblystyq ІІD baspasóz qyzmetinde.
